'استاد بسم اللہ خان نوحہ کے دھن کو شہنائی پر بجاتے تھے'

آنجہانی بھارت رتن شہنائی نواز استاد بسم اللہ خان کو محرم الحرام کے ماہ سے اس قدر لگاؤ تھاکہ وہ اس ماہ میں خاص طور پر اپنے اہل خانہ کو اس بات کی تلقین کیا کرتے تھے کہ' کوئی ایسی بات نہ کرو جس میں ہنسی کا شائبہ ہو'۔

ریاست اترپردیش کے ضلع بنارس کے بِنیاباغ علاقے میں واقع آنجہانی استاد بسم اللہ خان کے گھر پر محرم الحرام کے پیش نظر ان کی دختر زرینہ نے نوحہ خوانی کی اور حضرت امام حسینؓ کو یاد کیا۔

اس تعلق سے انہوں نے بتا کہ' بھارت رتن شہنائی نواز استاد بسم اللہ خان کو حضرت امام حسینؓ، اہل بیت اطہار اور شہدائے کربلا سے اس قدر الفت وابستگی تھی جس کا اندازہ لگانا مشکل ہے۔

زرینہ نے بتایا کہ ایام محرم الحرام میں استاد بسم اللہ خان شہنائی بجایا کرتے تھے۔ استاد بسم اللہ خان جس نوحہ کے دھن کو شہنائی پر بجایا کرتے تھے امام باڑے میں بھی اسی دھن پر نوحہ کیا جاتا تھا۔

استاد بسم اللہ خان امام حسینؓ کی شہادت کے غم میں اس قدرغرق ہوتے اور اہل خانہ سے کہتے کہ کوئی ایسی بات نہ کرو جس میں ہنسی کا شائبہ ہو۔ وہ مزید بتاتی ہیں کہ استاد بسم اللہ خان حضرت امام حسینؓ سے بے حد محبت کرتے تھے یہی وجہ ہے کہ ایام محرم میں بسم اللہ خان کو شدت سے یاد کیا جا رہا ہے'۔