ان لاک ون: پارکوں میں حکومت کی گائیڈ لائن پر کتنا عمل ہورہا ہے؟

ان لاک ون کا دور جاری ہے جس میں سبھی سرگرمیاں جاری ہیں۔ اس دوران کورونا وائرس سے متاثر مریضوں کی تعداد میں بھی تیزی سے اضافہ ہورہا ہے اور عوام کورونا وائرس سے بچنے کے قوانین کو نظر انداز کر رہی ہے۔

حکومت اور ضلع انتظامیہ کورونا وائرس کے انفیکشن کو روکنے کے لیے ہر ممکن اقدامات کر رہی ہے لیکن بیشتر لوگ اسے نظر انداز کررہے ہیں۔

بنارس کے سگرا علاقے میں واقع شہید ادیان پارک میں انجلی نے بتایا کہ صحت مند رہنے کے لیے ورزش ضروری ہے لیکن احتیاط کے ساتھ۔

مقامی شخص اوم شنکر نے بتایا کہ پارک میں کثیر افراد جمع ہوتے ہیں جن میں ہر فرد کی گیٹ پر ہی تھرمل اسکریننگ ہونا چاہیے لیکن ایسا نہیں ہورہا ہے جس سے کورونا وائرس کے بڑھنے کا قوی امکان ہے۔

ہریالی نے ای ٹی وی بھارت سے بات کرتے ہوئے بتایا کہ صبح چہل قدمی کے لیے سیکڑوں افراد جمع ہوتے ہیں بغیر ماسک اور سماجی دوری کے گھوم رہے ہیں یہ خطرناک ہوسکتا ہے۔ ساتھ ہی ہریالی نے کہا کہ ماسک لگا کر چہل قدمی کرنے سے تازی ہوا کا آکسیجن لینے سے ہم قاصر بھی ہیں۔

ہریش اگروال نے بتایا کہ وہ گذشتہ تین برسوں سے صبح چہل قدمی کے لیے اس پارک میں آتے ہیں انہوں نے کہا کہ لوگوں کو سبھی ہدایات پر عمل کرنا چاہیے اور کورونا کے ساتھ زندگی گزارنے کا سلیقہ سیکھنا چاہیے اب دوبارہ لاک ڈاؤن کے لیے کوئی تیار نہیں ہے۔

واضح رہے کہ کورونا وائرس کی وجہ سے حکومت نے ابھی تک جم خانہ، اور تعلیمی اداروں کو کھولنے کی اجازت نہیں دی ہے لیکن پارک میں لگے ورزش کے آلات سے عوام خوب ورزش کر رہی ہے جس سے کورونا وائرس کے پھیلنے کا خدشہ ظاہر کیا جا رہا ہے۔