ہندو مذہب کی مقدس ہستیوں میں شری رام سرِ فہرست ہیں یہی وجہ ہے کہ بھارت کی بیشتر زبانوں میں ان کا ذکر موجود ہے۔ اردو شعراء نے بھی رام کا ذکر بہت ہی فراخ دلی سے کیا ہے یہی نہیں بلکہ شاعر مشرق علامہ اقبال نے رام پر باضابطہ ایک نظم لکھا ہے جو کافی مشہور ہے۔ شاعر مشرق نے تو رام کو امام الہند کا لقب دیا ہے۔
بنارس ہندو یونیورسٹی کے شعبہ اردو کے صدر پروفیسر آفتاب احمد آ فاقی نے کہا کہ' قدیم زمانے سے لے کر موجودہ دور تک رام کسی نہ کسی طرح سے اردو شاعری میں جگہ پاتے رہے ہیں'۔
اردو شاعری کا ابتدائی دور دکن مانا جاتا ہے، اس زمانے میں شاہ تراب نے ایک مثنوی میں لکھا، جو من سمجھاون من بجھاون' کے نام سے ہے۔ اس میں انہوں نے کرشن، رام، لکچھمن، بھیم اور ارجن کا واضح طور پر ذکر کیا ہے۔ وہ لکھتے ہیں۔
کہیں کرشن اوتار کہیں رام لچھمن
کہیں بھیم ارجن کہیں ہم برہمن
کتے پوجھتے ہیں سدا رام لکچھمن
کتے پوجھتے ہیں ایک اور نرنجن
ولی دکنی کے بعد دکن میں بڑا نام سراج اورنگ آبادی کا ہے اس زمانے میں سراج اورنگ بادی نے رام کو برائی پر فتح کی حیثیت سے ذکر کیا ہے۔ یعنی رام ایک اچھائی کی علامت ہیں جبکہ راون برائی کی علامت۔ وہ لکھتے ہیں۔۔
'نین راون ہیں ارجن بال پلکیں بھوؤں دھنک بھیم کی
ہمارے دل کی دکھ نگری کی راجہ رام چندر ہوں۔
ہندوستانی تہذیب میں اس اعتبار سے رام کا ذکر اردو شاعری میں متعدد مقامات پر ملے گا اردو شعراء نے گنگا، جمنا رام، کرشن برنداون کو بہت خوبصورتی کے ساتھ استعمال کیا ہے، تصوف اور بھکتی میں بھی رام کا ذکر ملتا ہے۔
اردو شاعری میں رام رام کہنا، رام دہائی، رام کی مایا، رام کہانی سنانا وغیرہ جیسے محاوروں کا خوب استعمال ملتاہے۔