عازمین حج کو مایوسی ہوئی لیکن پُرامید رہنے کی ضرورت

کورونا وائرس کی وجہ سے بھارتی حکومت نے رواں برس سفر حج کو منسوخ کر دیا ہے۔ جس کی وجہ سے نہ صرف عازمین حج کو شدید مایوسی ہوئی بلکہ منتظمین حج کو بھی شدید صدمہ لاحق ہوا ہے۔

پروانچل حج سیوا سمیتی کے سرپرست مولانا ریاض احمد نے ای ٹی وی بھارت سے بات کرتے ہوئے بتایا کہ سفر حج کی منسوخی سے ہزاروں عازمین حج کو شدید مایوسی ہوئی ہے۔

انہوں نے کہا کہ مسلمان سفر حج کے لیے شدید محنت و مشقت کے ذریعے دولت جمع کرتا ہے اور بہت ہی پُر امید ہوتا ہے کہ اللہ کے گھر کی زیارت کرے گا لیکن حج کی منسوخی سے عازمین کے ساتھ منتظمین کو بھی شدید غم ہے۔ پروانچل حج سیوا سمیتی ہر برس ٹریننگ سے لے کر روانگی تک مسلسل خدمات انجام دیتی تھی لیکن رواں برس اس سے محرومی رہے گی۔

انہوں نے مزید کہا کہ اس کے باوجود بھی سبھی کو پر امید رہنے کی ضرورت ہے اور دعا کریں کورونا وائرس ملک اور دنیا سے ختم ہو تاکہ آئندہ برس کثیر تعداد میں حجاج کرام مدینہ اور مکہ شریف میں حاضر ہوں۔

انہوں نے شریعت کا موقف واضح کرتے ہوئے کہا کہ سفر حج کی منسوخی سے صاحب استطاعت پر شریعت کی جانب سے کوئی گرفت نہیں ہے کیوں کہ جب حکومت نے منسوخ کردیا ہے تو استطاعت بھی باقی نہ رہی۔