ریاست اترپردیش کے ضلع بنارس کے چھ اسپتالوں میں ڈمی کورونا ویکسین کا ڈرائی رن کیا گیا جس میں 150 افراد کو ڈمی ٹیکہ دیا گیا ہے۔
حالانکہ ان تمام کاموں کا افسران نے جائزہ لیا ہے اور اس سے متعلق تمام تر تیاریاں مکمل ہونے کا دعوی کیا گیا لیکن ای ٹی وی بھارت نے گراؤنڈ زیرو سے ان تیاریوں کا جائزہ لیا تب معاملہ اس کے برعکس نظر آیا۔
ضلع انتظامیہ کے مطابق تمام اسپتالوں میں سبھی تیاریاں مکمل کرلی گئیں ہیں لیکن ای ٹی وی بھارت نے جب کبیر چورا ہسپتال کا گروانڈ زیرو سے جائزہ لیا تو یہاں ادھوری تیاری نظر آئی۔
اسپتال کے ایک بڑے ہال میں کورونا سے تحفظ کے لیے مختلف پوسٹرز کے ذریعہ اطلاعات چسپاں کیے گئے ہیں لیکن ٹیکہ کاری کا کوئی منظم تیاری نظر نہیں آئی ۔
اس ہسپتال میں تین کمرے ٹیکہ کے لیے مختص کیے گئے ہیں دو کمرے میں بیڈ نظر آئے اور ایک کمرہ خالی نظر آیا۔
دیکھ بھال کرنے والے ملازم نے بتایا کہ کرسی اور میز افسران کو دکھانے کے لیے باہر سے منگائے گئے تھے جو دوبارہ وہیں پہنچا دیے گئے ہیں۔ اس طرح سے ڈرائی رن کی تیاریاں بھی آدھی ادھوری رہیں۔
واضح رہے کہ منگل کی صبح اسی ہسپتال میں ڈمی کورونا ویکسین کو ایک طبی اہلکار سائیکل سے لے کر پہنچا تھا اور اسے ضلع انتظامیہ کی بڑی لاپروائی مانا جارہا تھا۔
