اجین معاملے کی ویڈیو کی فارنسک جانچ کی جانی چاہیے: قاضیٔ شہر

مدھیہ پردیش کی اجین پولیس نے ویڈیو کی تحقیق کیے بغیر اقلیتی طبقے سے تعلق رکھنے والوں کو گرفتار کیا ہے۔

ریاست مدھیہ پردیش کے تاریخی شہر اجین میں عاشورہ کے موقع پر پولیس نے ناگوار نعرے لگانے کے معاملے کچھ لوگوں کو گرفتار کیا ہے۔ اس معاملے میں قاضیٔ شہر شفیق الرحمٰن نے کہا ہے کہ ویڈیو کی فارنسک جانچ کی جانی چاہیے۔ اگر کوئی قصوروار ہیں تو اسے سخت سزا ملنی چاہیے۔

جانکاری کے مطابق جب عاشورہ کی رات کو لوگ تعزیہ داری کی زیارت کے لیے جمع ہوئے تو لوگ جم کر نعرے بازی کرنے لگے۔ جس کی اطلاع کسی نے پولیس کو دی کہ یہاں ناگوار نعرے بازی بھی کی جارہی ہے جس پر پولیس نے معاملہ درج کرکے کچھ لوگوں کو گرفتار کرلیا جس کا ویڈیو اب بھی سوشل میڈیا پر گردش کررہا ہے۔

معلوم ہو کہ محرم الحرام کا چاند نظر آتے ہی تاریخی شہر اجین میں مذہبی تقریبات کا انعقاد شروع ہوجاتا ہے، یہاں محرم الحرام پورے شہر میں بڑے جوش و خروش کے ساتھ منایا جاتا ہے مگر گزشتہ سال کی طرح اس سال بھی انتظامیہ نے جلوس کی اجازت تو نہیں دی تھی مگر تعزیہ داری کی اجازت دی تھی۔