سی پی ایم نے دو ملیالی ٹی وی چینلوں پر پابندی کی سخت مذمت کی

مارکسوادی کمیونیسٹ پارٹی (سی پی ایم) نے دہلی فسادات کی رپورٹ دکھانے والے دو ملیالی چینلوں کو 48گھنٹے کے لیے بند کرنے کے حکومت کے حکم کی سخت مذمت کی ہے اور اسے میڈیا کی آزادی پر حملہ قرار دیا ہے۔

سی پی ایم پولٹ بیورو نے آج ایک بیان جاری کرکے حکومت کو اس کارروائی کے لیے آڑے ہاتھوں لیتے ہوئے اسے میڈیا کی آواز کو دبانے کی کوشش کا حصہ قرار دیا۔

پارٹی نے کہا کہ اطلاعات و نشریات کی وزارت کی طرف سے ایشیا نیٹ نیوز اور میڈیا ون کی نشریات کو اس طرح بند کرنا اس بات کا ثبوت ہے کہ حکمراں جماعت اپنے خلاف کسی بھی طرح کی خبروں سے پریشان ہے اور وہ نہیں چاہتی ہے کہ کوئی بھی سنگھ پریوار کے رول اور فسادات میں پولیس کی اپنی ذمہ داریوں سے عدم توجہی کے بارے میں سوال اٹھائے۔ پارٹی نے کہا کہ یہ براہ راست میڈیا کی آزادی پر حملہ ہے اور حکومت اس پابندی کو فورا واپس لے۔

بیان میں مزید کہا گیا ہے کہ میڈیا پر پابندی کا اصل مقصد یہ ہے کہ فرقہ وارانہ فسادات پر قابو پانے میں مرکزی حکومت کی نا اہلی پر پردہ پوشی کی جا سکے اور ا ن فسادات کو بھڑکانے میں ملوث حکمراں پارٹی کے لیڈروں کو بچایا جاسکے۔