سرینگر: نامعلوم افراد نے سیاسی کارکن کی گاڑی کو نذر آتش کیا

منگل اور بدھ کی درمیانی شب جموں و کشمیر اپنی پارٹی کے ضلع سیکریٹری کی نجی گاڑی کو 'شرپسندوں' نے نذر آتش کر دیا۔

جموں و کشمیر کی گرمائی دارالحکومت سرینگر میں گزشتہ شب نا معلوم افراد نے جموں و کشمیر اپنی پارٹی کے ڈسٹرکٹ سیکریٹری کی گاڑی کو نذر آتش کر دیا۔

پولیس کے ایک آفیسر نے ای ٹی وی بھارت کو بتایا کہ ’’گزشتہ شب شہر کے حبہ کدل علاقے میں جموں و کشمیر اپنی پارٹی کے لیڈر جیلانی کمار کی اسکارپیو گاڑی کو آگ لگا دی گئی، کمار خود گاڑی میں موجود نہیں تھے۔‘‘

ان کا مزید کہنا تھا کہ جیلانی کمار کی نجی گاڑی، زیر رجسٹریشن نمبر DL12CA 1466 ، کو کافی نقصان پہنچا ہے۔ اس حوالے سے معاملہ درج کیا گیا ہے اور تحقیقات جاری ہے۔‘‘

وہیں جب ای ٹی وی بھارت نے پارٹی کے ترجمان سے رابطہ قائم کیا تو ان کا کہنا تھا کہ انہیں اس حوالے سے کوئی معلومات نہیں ہے۔