جموں و کشمیرپولیس اہلکاروں نے ماؤنٹ ایوریسٹ سرکیا

جموں و کشمیر پولیس کے کانسٹیبل نذیر احمد اور کانسٹیبل فلیال سنگھ نے دنیا کی سب سے اونچی چوٹی ماؤنٹ ایوریسٹ سر کرنے میں کامیابی حاصل کر لی ہے۔

وزیر داخلہ راجناتھ سنگھ، ریاست کے گورنر ستیہ پال ملک اور ڈی جی پی دلباغ سنگھ نے دونوں اہلکاروں کو مبارکباد پیش کی ہے۔

واضح رہے کہ 18 مئی کو جانے مانے ماؤنٹینیئرنگ گائیڈ کامی ریٹا شرپا کی نگرانی میں 11 اراکین پر مشتمل پولیس ٹیم، جس میں جموں و کشمیر پولیس کے دو اہلکار بھی شامل تھے، نے ایورسٹ کی چڑھائی شروع کی تھی اور منگل کی صبح اسے سرَ کرنے میں کامیابی حاصل کر لی۔

ریٹا شیرپا اب تک ماؤنٹ ایوریسٹ کو 24 مرتبہ سر کر چکے ہیں اور یہ ان کا اس ہفتے کا دوسرا دور تھا۔

نذیر اور فلیال سنگھ کے علاوہ پولیس کی ماؤنٹینیئرنگ ٹیم میں 9 اہلکار خفیہ محکمہ سے تعلق رکھتے ہیں۔