محبوبہ مفتی کے بیان میں کچھ بھی غلط نہیں: پروفیسر سوز

سابق مرکزی وزیر پروفیسر سیف الدین سوز نے کہا کہ بی جے پی کے تین سینئر وزرا سیتا رمن، مختار عباس نقوی اور انوراگ ٹھاکر نے کشمیر سے متعلق محبوبہ مفتی کے بیان پر تنقید کرکے اپنی بے خبری اور جہالت کا ثبوت دیا ہے۔

کانگریس پارٹی کے سینیئر رہنما سیف الدین سوز نے کہا کہ محبوبہ مفتی نے کشمیر کے جھگڑے کو حل کرنے کے سلسلے میں پاکستان کے رول کا ذکر کیا ہے جو ایک سچائی ہے۔ پروفیسر سوز نے یہاں جاری ایک بیان میں کہا کہ محبوبہ مفتی نے یہ کہا ہے کہ کشمیر کا جھگڑا بات چیت سے طے ہو سکتا ہے اور جموں و کشمیر کے لوگوں کے علاوہ پاکستان کے ساتھ بھی بات ہونی چاہئے۔

انہوں نے کہا "اس بیان میں کیا غلط ہے؟ کیا ساری دنیا نے پاکستان کو اس جھگڑے کا بنیادی فریق تسلیم نہیں کیا ہے؟ کیا پاکستان کو بحیثیت فریق اقوام متحدہ نے تسلیم نہیں کیا ہے؟" سوز نے کہا کہ بی جے پی وزرا نے دراصل اس بات کا ثبوت دیا ہے کہ وہ واقعات نہیں بلکہ پروپگنڈا پر بھروسہ کرتے ہیں۔

ان کا مزید کہنا ہے کہ "کشمیر کا جھگڑا حل کرنے کی صحیح تجویز یہی ہے کہ بات چیت کا دروازہ کھولا جانا چاہئے اور جموں و کشمیر کے لوگوں کے علاوہ پاکستان سے بھی بات ہونی چاہئے۔"

(یو این آئی)