Court Summons Farooq Abdullah: عدالت نے فاروق عبداللہ کو جے کے سی اے بدعنوانی کیس میں طلب کیا

پرنسپل ڈسٹرکٹ اینڈ سیشن جج سرینگر نے انفورسمنٹ ڈائریکٹوریٹ (ای ڈی) کی طرف سے جے کے سی اے منی لانڈرنگ کیس میں عبداللہ اور دیگر کے خلاف دائر کی گئی شکایت پر 27 اگست کو سمن جاری کیا۔ Court Summons Farooq Abdullah

سرینگر:سرینگر کی ایک عدالت نے نیشنل کانفرنس کے صدر اور رکن پارلیمنٹ فاروق عبداللہ کو جموں و کشمیر کرکٹ ایسوسی ایشن (جے کے سی اے) میں مبینہ مالی بے ضابطگیوں سے متعلق منی لانڈرنگ کیس میں طلب کیا۔ پرنسپل ڈسٹرکٹ اینڈ سیشن جج سرینگر نے انفورسمنٹ ڈائریکٹوریٹ (ای ڈی) کی طرف سے جے کے سی اے منی لانڈرنگ کیس میں فاروق عبداللہ اور دیگر کے خلاف دائر کی گئی شکایت پر 27 اگست کو سمن جاری کیا۔ Court Summons Farooq Abdullah on JKCA scam case

قابل ذکر ہے کہ عبداللہ کو ای ڈی نے 31 مئی کو سرینگر آفس راج باغ میں تین گھنٹوں تک پوچھ گچھ کی۔ واضح رہے کہ یہ اسکینڈل 2002 سے 2011 تک بورڈ آف کنٹرول فار کرکٹ ان انڈیا (بی سی سی آئی) کی جانب سے جموں و کشمیر کرکٹ ایسوسی ایشن کو ریاست میں کرکٹ کی سرگرمیوں کے فروغ کے لیے فراہم کیے گئے 113 کروڑ 67 لاکھ روپے سے متعلق ہے۔

اس رقم میں سے مبینہ طور پر 40 کروڑ روپے کا خرد برد کیا گیا تھا۔ یہ خرد برد اس وقت کیا گیا جب فاروق عبداللہ ریاستی کرکٹ ایسوسی ایشن کے صدر تھے۔ اس بدعنوانی کے معاملے کو جموں و کشمیر عدالت عالیہ نے سنہ 2015 میں جانچ کے لیے سی بی آئی کے حوالے کرنے کا فیصلہ کیا تھا۔ اس سے قبل اس معاملے کی جانچ جموں و کشمیر پولیس کر رہی تھی تاہم کورٹ نے اس کو بعد میں سی بی آئی کے سپرد کر دیا تھا۔

سی بی آئی کی جانچ کے بعد چند عہدیداروں بشمول کرکٹ ایسوسی ایشن کے جنرل سیکرٹری احسن مرزا اور محمد سلمان خزانچی کو جیل بھیجا گیا تھا۔ دفعہ 370 کی منسوخی سے قبل بھی فاروق عبداللہ کو ای ڈی نے 2019 میں چندی گڑھ طلب کرکے پوچھ گچھ کی تھی۔