پونچھ: سکیورٹی فورسز نے حوالہ ریکیٹ کے دو ملزمین کو حراست میں لیا

جموں و کشمیر کے ضلع پونچھ کی تحصیل مینڈھر کے بالاکوٹ سیکٹر میں سیکورٹی فورسز نے حوالہ ریکٹ کے دو ملزمین کو 25 لاکھ 81 ہزار کی نقدی کے ساتھ حراست میں لے لیا، پولیس نے ملزمین کے خلاف مقدمہ درج کرکے پوچھ گچھ شروع کردی ہے۔

پولیس سے موصولہ معلومات کے مطابق پولیس کو اطلاع ملی تھی کہ لائن آف کنٹرول کے بالاکوٹ سیکٹر کے کنگا گلی علاقے سے کچھ لوگ پاکستان کی شدت پسند تنظیموں کے رابطے میں ہیں اور ملک مخالف سرگرمیوں میں ملوث ہیں۔

اطلاعات کی بنیاد پر ایس ایس پی پونچھ ڈاکٹر ونود کمار کی ہدایات پر ایس ڈی پی او ظہیر جعفری اور ایس ایچ او منڈھر منظور کوہلی کی قیادت میں پولیس اور سیکورٹی فورسز نے چھاپے مارا۔

ملزمین کی شناخت محمد الیاس اور شکیل احمد کے طور پر کی گئی ہے، ملزمین کے خلاف تھانہ مینڈھر میں کیس درج کیا گیا ہے اور تفتیش جاری ہے۔