کشمیر: پولیس حراست میں نوجوان کی موت

پولیس نے اعتراف کیا ہے کہ اس کی حراست میں رضوان پنڈت کی موت ہوگئی جس کی مجسٹریٹ سے تفتیش کا حکم دیا گیا ہے۔

اطلاعات کے مطابق 25 سالہ رضوان اسد پنڈت کو کچھ روز قبل پولیس حراست میں لیا گیا تھا اور عسکریت پسندوں کے متعلق اس سے پوچھ گچھ کی جا رہی تھی۔ تاہم نا معلوم وجوہات کی بنا پر اس کی حراست میں دوران شب موت ہو گئی ۔

پولیس نے اعتراف کیا ہے کہ رضوان اسد پنڈت ان کی حراست میں تھااور عسکریت پسندی سے متعلق ایک کیس کے سلسلے میں اس سے پوچھ گچھ کی جارہی تھی۔

پولیس ترجمان نے کہا کہ پنڈت کی دوران حراست موت واقع ہوئی ہے اور اس سلسلے میں فوجداری قانون کے تحت مجسٹریٹی جانچ کا حکم دے دیا گیا ہے۔

اس کے علاوہ جائے واقعہ پر پولیس الگ سے تحقیقات کررہی ہے۔

ادھر نوجوان کی موت کی اطلاع ملنے کے بعد اسلامک یونیورسٹی اونتی پورہ کو بند کردیا گیا ہے۔