گیلانی سے منسوب ہڑتال کی کال فرضی: پولیس

جموں و کشمیر پولیس نے علیل حریت رہنما سید علی گیلانی سے منسوب کی گئی پانچ اگست کو ہڑتال کی کال کو فرضی قرار دیا ہے۔

وسطی کشمیر کے ضلع بڈگام پولیس نے ٹویٹر ہینڈل پر لکھا کہ گیلانی کے اہل خانہ کے ذرائع کے مطابق یہ ٹویٹ فرضی ہے جو پاکستان سے جاری کی گئی ہے اور جو افراد اس ٹویٹ کو سوشل میڈیا پر پھیلا رہے ہیں، ان کے خلاف کارروائی کی جائے گی۔

پولیس نے اپنے ٹویٹر اکاؤنٹ پر اس بیان کو بھی چسپاں کیا ہے جس کو گیلانی سے منسوب کیا گیا ہے۔

اس بیان کے مطابق سید علی شاہ گیلانی نے پانچ اور پندرہ اگست کو جموں و کشمیر میں ہڑتال کی کال دی ہے۔

پولیس کا کہنا ہے کہ اس معاملے میں یو اے پی اے کے تحت بڈگام پولیس تھانہ میں مقدمہ درج کیا گیا ہے۔
واضح رہے کہ جمعرات یعنی پانچ اگست جموں و کشمیر کی خصوصی حیثیت ختم ہونے کی دوسری برسی ہے۔