گاندربل: مانسبل علاقے کے لوگ سرپنچ اور پنچ سے نالاں

حکومت نے سرپنچ الیکشن کرنے کے دوران دعویٰ کیا تھا کہ یہ الیکشن مکمل ہونے کے بعد ہر علاقے میں سرپنچوں کے ذریعے ڈیولپمنٹ کے کام کرکے لوگوں کو ان کا حق دلاکر ہر علاقے کو خوبصورت بنایا جائے گا، لیکن حقیقت اس کے برعکس ہے۔

مانسبل گاندربل کے لوگوں نے اپنے منتخب کیے ہوئے سرپنچ اور پنچوں پر الزام لگایا ہے کہ گزشتہ آٹھ ماہ سے ان کے علاقے میں کسی بھی طرح کا بلاک لیول کا کام نہیں ہوا ہے۔

لوگوں کا الزام ہے کہ 'جس وقت سرپنچوں اور پنچوں کو ووٹ کی ضرورت تھی اس وقت ان لوگوں نے ہمارے ساتھ ووٹ لے کر بلند بانگ دعوے کرنے سے پرہیز نہیں کیا تھا، حتی کہ انہوں نے پیر بھی پکڑ لیے تھے۔ لیکن اس کے برعکس سب کچھ ویسا ہی ہے جیسا الیکشن سے پہلے تھا'۔ انہوں نے الزام لگایا ہے کہ علاقے میں گندگی کے ڈھیر پڑے ہیں جب کہ کسی بھی طرح کا کام نہیں ہورہا ہے، جس کی وجہ سے عوام سرپنچوں اور پنچوں سے سخت ناراض دکھائی دے رہے ہیں۔

بتایا جاتا ہے کہ اس علاقے کے سبھی پنچ سرپنچ سے اس وجہ سے ناراض ہیں کہ گزشتہ آٹھ ماہ سے سرپنچ نے ان کے علاقوں میں کاموں کو روک کے رکھا ہے اور ان پنچوں نے الزام لگایا ہے کہ سرپنچ کی وجہ سے ان کے محلے میں کام نہ کرنے کی وجہ سے ان کا محلہ ویرانی کا منظر پیش کررہا ہے۔

پنچوں نے کہا ہے کہ انہوں نے یہ معاملہ ڈی سے گاندربل، ضلع پنچایت آفیسر گاندربل اور متعلقہ بلاک ڈیولپمنٹ آفیسر کی نوٹس میں بھی لایا، لیکن کوئی کارروائی نہیں ہورہی ہے۔ انہوں نے کہا کہ اگر ایک ہفتے کے اندر اندر ان کی مانگ کو پورا نہیں کیا گیا تو وہ سبھی پنچ اپنا استعفیٰ پیش کرکے اپنے آپ کو اس پنچایت سے الگ کریں گے۔

اس سلسلے میں متعلقہ ضلع پنچایت آفیسر نے کہا ہے کہ ہم اس معاملے کا بغور جائزہ لیں گے اور اس کی جانچ کریں گے کہ کیوں اس علاقے کو سرپنچ نظر انداز کررہا ہے۔ انہوں نے کارروائی کی یقین دہانی کی ہے۔ اب دیکھنا ہے کہ کیا واقعی کارروائی ہوگی یا کارروائی صرف کارروائی بولنے تک ہی محدود رہے گی۔