Jailed Journalist Fahad Shah: محروس صحافی فہد شاہ کے گھر اور دفتر پر چھاپے

قومی تحقیقاتی ایجنسی (این آئی اے) اور اسٹیٹ تحقیقاتی ایجنسی (ایس آئی اے) نے آج محروس صحافی فہد شاہ کے گھر اور ان کے دفتر (دی کشمیر والا) پر چھاپے مارے اور تلاشی لی۔

اطلاعات کے مطابق این آئی اے اور ایس آئی اے کی ٹیموں نے آج صبح مشترکہ طور پر فہد شاہ کے گھر جو صورہ کے آنچار میں واقع ہے اور ان کے دفتر 'دی کشمیر والا' جو راج باغ میں واقع ہے پر چھاپے مارے۔ ایجنسی کی ٹیموں نے تلاشی لی اور صحافی کے افراد خاندان سے پوچھ تاچھ کی۔ یاد رہے کہ فہد شاہ گزشتہ دو ماہ سے پبلک سیفٹی ایکٹ کے تحت کپواڑہ کی جیل میں قید ہیں۔ تیس برس کے فہد شاہ 'دی کشمیر والا' ڈیجیٹل میگزین کے مدیر ہیں۔

قابل ذکر ہے کہ فہد شاہ پر پولیس نے ضلع پلوامہ، شوپیان اور سرینگر کے صفہ کدل میں تین مقدمے درج کئے تھے جس کے بعد انہیں جیل بھیج دیا گیا تھا، تاہم عدالت نے فہد شاہ کو ان تینوں مقدمات میں ضمانت دی ہے لیکن ضلع سرینگر کے مجسٹریٹ محمد اعجاز نے فہد پر پبلک سیفٹی ایکٹ کے تحت کارروائی کرتے ہوئے کپواڑہ جیل بھیج دیا جہاں وہ قید میں ہیں۔