'جموں و کشمیر انتظامیہ کو مرحوم گیلانی کی آخری وصیت کا احترام کرنا چاہیے تھا'

سری نگر میں میڈیا نمائندوں سے محبوبہ مفتی نے کہا کہ 'بزرگ علیحدگی پسند رہنما سید علی شاہ گیلانی کی تدفین میں انتظامیہ کی جانب سے روکاوٹیں پیدا کرنا اور ان آخری خواہشات کی تکمیل نہ کرنا بے حد افسوسناک ہے۔

سرینگر میں پیپلز ڈیمو کریٹک پارٹی کی صدر و سابق وزیر اعلیٰ محبوبہ مفتی نے بزرگ علیحدگی پسند رہنما سید علی گیلانی کی تدفین میں انتظامیہ کی جانب سے پیدا کی گئی روکاوٹ اور مرحوم کی وصیت کے مطابق ان کی تدفین کی اجازت نہ دینے پر کہا کہ 'گیلانی مرحوم کی وصیت کو بالائے طاق رکھ کر اپنی من مانی کرنا، ملک کے جمہوری ہونے کے دعوے پر سوالیہ نشان کھڑا کرتاہے؟

انہوں نے کہا کہ 'اختلافات اپنی جگہ ہیں، لیکن جو مرحوم گیلانی کے ساتھ کیا گیا ایسا کسی بھی ملک میں میت کے ساتھ نہیں کیا جاتا ہے اور یہ بے حد افسوسناک ہے۔

ایک سوال کے جواب میں سابق وزیر اعلیٰ نے کہا کہ 'جمہوریت میں سب کو اپنے اپنے حقوق حاصل ہے'۔