Srinagar Encounter: ہلاک کئے گئے عسکریت پسند شہر میں حملے کرنے آئے تھے: آئی جی پی کشمیر

جموں و کشمیر کے دارالحکومت سرینگر کے رعناواری علاقے میں ہلاک کیے گیے دو عسکریت پسند شہر میں 'سافٹ ٹارگیٹ' ہلاکتیں کرنے کی غرض سے آئے تھے۔ ان باتوں کا اظہار کشمیر پولیس زون کے انسپکٹر جنرل وجے کمار نے تصادم کے بعد میڈیا کے روبرو کیا۔ IGP Kashmir Vijay Kumar on Srinagar Encounter

سرینگر انکاؤنٹر میں دو عسکریت پسندوں کی ہلاکت کے بعد انسپکٹر جنرل آف پولیس وجے کمار نے کہا کہ بدھ کو پولیس عسکریت پسندوں کے متعلق خفیہ اطلاع ملتے ہی اس علاقے کا محاصرہ کیا گیا۔ Militant Killed in Srinagar Encounter انہوں نے کہا کہ اس تصادم میں دو عسکریت پسند ہلاک کئے گئے ہیں جن کی شناخت رئیس احمد بھٹ اور ہلال احمد راہ کے طور پر ہوئی، دونوں کا تعلق ضلع اننت ناگ کے بجبہاڑہ علاقے سے تھا۔ انسپکٹر جنرل نے مزید کہا کہ رئیس احمد بھٹ گزشتہ برس اگست مہینے میں عسکریت پسندوں کی صف میں شامل ہوا تھا اور سوشل میڈیا پر ایک نیوز پیج چلارہا تھا۔ عسکریت پسندوں کی تعداد کے متعلق آئی جی پی نے کہا کہ ان کی تعداد آئے روز کم ہوتی جارہی ہے۔

انسپکٹر جنرل وجے کمار نے کہا کہ گزشتہ برس سکیورٹی فورسز نے متعدد انکاؤنٹر کے سبب عسکریت پسندوں کی تعداد دو سو سے کم کردی تھی اور امسال یہ تعداد ایک سو سے نیچے لانے کہ کوشش کی جارہی ہے۔ ان کا کہنا تھا کہ پاکستان، اس کے حامی اور کشمیر میں چند صحافی عسکریت پسندی کو سوشل میڈیا کے غلط استعمال سے فروغ دینے کی کوشش کر رہے ہیں جس کے سبب پولیس کو صحافیوں کے خلاف کارروائی کرنا پڑتی ہے۔