گذشتہ سات برسوں میں بی جے پی نے ملک کو بیچ دیا: محبوبہ مفتی

سابق وزیر اعلیٰ محبوبہ مفتی نے آج جنوبی کشمیر کے ضلع شوپیان کا دورہ کیا جہاں انہوں نے عوامی جلسے سے خطاب کرتے ہوئے بی جے پی پر تنقید کی۔ انہوں نے کہا کہ بی جے پی نے پورے ملک کو گزشتہ سات برسوں میں بیچ ڈالا۔

پیپلز ڈیمو کریٹک پارٹی (پی ڈی پی) کی صدر و سابق وزیر اعلیٰ محبوبہ مفتی نے جنوبی کشمیر کے ضلع شوپیان میں عوامی جلسے سے خطاب کیا۔ اس دوران پارٹی کے سینیئر لیڈران اور پارٹی کارکنوں نے کنونشن میں حصہ لیا۔

محبوبہ مفتی نے پارٹی کارکنان سے خطاب کرتے ہوئے بتایا کہ گزشتہ 70 سال سے جو ہندوستان کی سیاسی جماعتوں خصوصاً کانگریس نے ملک کے لیے کیا اسے موجود حکومت بھارتیہ جنتا پارٹی نے ملک ہندوستان کو گزشتہ 7 سال کے دوران بیچ ڈالا جن میں یہاں کے پیٹرول پمپ، ریلوے اسٹیشنز، ہوائی اڈے انڈسٹریز وغیرہ شامل ہیں۔

علاحدگی پسند جماعت حریت کانفرنس پر پابندی عائد کرنے کے سوال کے جواب میں انہوں نے بتایا کہ جموں و کشمیر کے سیاسی و سماجی کارکنان کو یہاں پر دبوچ لیا گیا ہے حریت کانفرنس کی تو بات ہی نہیں ہے۔

انہوں نے بتایا کہ جموں و کشمیر کا الحاق جواہر لال نہرو کے ہندوستان کے ساتھ ہوا ہے جس ہندوستان کو جواہر لال نہرو، گاندھی جی اور کانگریس نے بنایا ہے اور اسی بھائی چارے کو بی جے پی ختم کرنا چاہتی ہے۔

آخر میں انہوں نے پارٹی کارکنوں کا شکریہ ادا کیا اور بتایا کہ پی ڈی پی کے کچھ لیڈران پارٹی چھوڑ کر چلے گئے ہیں تاہم جموں و کشمیر کے لوگوں نے پارٹی کو نہیں چھوڑا۔