پولیس نے مغل روڑ پر درماندہ مزدوروں کی مدد کی

خراب موسم کے سبب تاریخی مغل روڑ پر درماندہ کئی مزدوروں کی مدد کے لیے جموں و کشمیر پولیس کی ٹیم سامنے آئی اور انہیں محفوظ مقامات پر پہنچایا۔

جنوبی کشمیر کے پہاڑی ضلع شوپیاں میں تازہ برفباری کی وجہ سے مغل روڑ پر پھنسے ہوئے بجلی ٹاور بنانے والے کئی افراد کو پولیس نے بچا لیا۔

نصف درجن سے زیادہ بجلی کے ٹاورز بنانے والے مزدور تازہ برفباری کی وجہ سے مغل روڑ پر دبجن کے علاقے میں درماندہ ہو گئے۔ جوں ہی شوپیاں پولیس کو اس معاملے کی اطلاع موصول ہوئی، ایس ایچ او ہیرپورہ کی قیادت میں ایک ٹیم فوری طور انکی مدد کے لئے روانہ ہوئی۔

دبجن پہنچ کر جموں و کشمیر پولیس کی ٹیم نے ان افراد کو وہاں سے نکال کر محفوظ مقامات پر پہنچایا۔ جس پر پھنسے مزدوروں نے پولیس کا شکریہ ادا کیا۔

واضح رہے کہ وادی کشمیر کے مختلف بالائی علاقوں کی طرح تاریخی مغل روڑ پر بھی ہفتہ کی صبح برفباری کا سلسلہ شروع ہوا جو خبر لکھے جانے تک جاری تھا۔

ذرائع ابلاغ کے نمائندوں کے ساتھ بات کرتے ہوئے پولیس نے کہا کہ درماندہ مزدوروں کو بچانا اولین ترجیح تھی، تاہم انکے سامان کو بھی جلد گاڑیوں میں لاد کر شوپیاں پہنچایا جائے گا۔

برفباری کی وجہ سے 84 کلومیٹر لمبی مغل شاہراہ، جو صوبہ جموں کے ضلع راجوری اور پونچھ کو راست وادی کشمیر سے ملاتی ہے، کو ٹریفک کی آمد و رفت کے لیے بند کر دیا گیا ہے۔