کشمیر کے اسپتالوں میں ایمبولنس کی شدید قلت

وادی کشمیر کے اسپتالوں میں کریٹیکل کیئر ایمبولینسز کی شدید قلت ہے۔ وادی کے دس اضلاع میں صرف 12 ایمبولینس ہیں، جن میں سے تین ایک این جی او نے سرکار کو تین سال پہلے وقف کردی تھی۔

شہر کے شیر کشمیر انسٹیٹیوٹ آف میڈیکل سائنسز میں علاج کے لیے آئے ایک مریض کے رشتے دار کا کہنا ہے " کریٹیکل کیئر ایمبولینس کی کمی کے پیش نظر ہمیں کافی مشکلات کا سامنا کرنا پڑتا ہے۔ وقت پر تو سیدھی سادی ایمبولنس بھی دستیاب نہیں ہوتی۔ اس وجہ سے اکثر مریض ہسپتال پہنچنے سے پہلے ہی دم توڑ دیتے ہیں۔"
وہیں ریاستی انتظامیہ کا کہنا ہے " اس مسئلے کو حل کرنے کی ہر ممکن کوشش کی جارہی ہے اور امید ہے کہ جلد ہی حل ہو جائے گی۔"

ای ٹی وی بھارت سے ہیلتھ سے متعلق اعلیٰ عہدے پر فائز ایک افسر نے کیمرہ پر نہ آنے کی شرط پر بات کرتے ہوئے کہا " 102 اور 108 خدمات کو منظوری ملنے کے بعد وادی میں یہ مسئلہ نہیں رہے گا۔ اس ضمن میں ہم نے سارے لوازمات مکمل کر لیے ہیں، اب بس مرکزی حکومت کی حامی کا انتظار ہے۔"ان کا مزید کہنا ہے "امید ہے کہ اگلے تین چار مہینوں میں تقریباً 400 کرکٹ کل کیئر ایمبولینسز وادی کے ہسپتالوں میں عوام کی خدمت کے لیے تیار ہوگی۔"واضح رہے کہ اس وقت وادی میں 540 ایمبولنسز موجود ہیں لیکن ان ایمبولینس میں بھی بنیادی سہولتیں میسر نہیں ہیں۔محکمہ صحت کے مطابق یہ ایمبولینسز صرف مریضوں کو لے جانے اور لانے کے لئے ہے۔