سرینگر ہوائی اڈے سے بین الاقوامی پروازوں کا آغاز کرنے کی ضرورت: کے سی سی آئی

جموں و کشمیر کے ایل جی منوج سنہا نے کہا کہ مرکزی وزیر اور جموں و کشمیر انتظامیہ نے سرینگر شارجہ کے درمیان پہلی بین الاقوامی پرواز جلد شروع کرنے پر اتفاق کیا۔

مرکزی حکومت نے سرینگر ہوائی اڈے سے سرینگر شارجہ پرواز سروس کا اعلان کیا۔ یہ اعلان جموں و کشمیر کے لیفٹیننٹ گورنر منوج سنہا اور مرکزی وزیر شہری و ہوا بازی جیوتی رادتیہ سندھیا نے کشمیر دورے کے دوران کیا تھا۔ اس اعلان سے وادیٔ کشمیر کے تاجر اور سیاحت سے جڑے افراد خوش نظر آرہے ہیں، تاہم ان کا کہنا ہے کہ اس اعلان کو عملی جامہ پہنایا جانا چاہئے۔

جموں و کشمیر کے ایل جی منوج سنہا نے کہا کہ مرکزی وزیر اور جموں و کشمیر حکومت نے سرینگر شارجہ کے درمیان پہلی بین الاقوامی پرواز جلد شروع کرنے پر اتفاق کیا ہے۔ انہوں نے کہا کہ اس سے براہ راست بین الاقوامی رابطہ ہوگا جو جموں و کشمیر کے عوام کا ایک طویل مطالبہ ہے۔
ہم آپ کو بتادیں سنہ 2010 میں مرکزی حکومت نے سرینگر اور دبئی شہروں کے مابین پرواز شروع کی تھی لیکن چھ ماہ کے بعد اس سروس کو بند کردیا گیا تھا۔ سرینگر سے بین الاقوامی پرواز سروس شروع کرنا عوام و تاجروں کا ایک دیرینہ مطالبہ ہے لیکن ابھی تک حکومت نے اس مطالبے میں سنجیدگی نہیں دکھائی ہے۔

کے سی سی آئی صدر شیخ عاشق کا کہنا ہے کہ متحدہ عرب امارت اور دیگر شہروں میں پرواز شروع کرنے سے وادی کی ہینڈی کرافٹ اور دیگر مصنوعات کی تجارت میں آسانی ہوگی۔
ان کا کہنا ہے کہ تجارت کے علاوہ سیاحت کو بھی کافی فروغ مل پائے گا، کیونکہ فی الوقت سیاحوں کو سرینگر تک کنیکٹنگ فلائٹ سے آنا پڑرہا ہے جو سفر کرنے کے لئے کٹھن ہے۔

وہیں ٹریول ایجنٹس ایسوسی ایشن آف کشمیر کے صدر فاروق احمد کتھو کا کہنا ہے کہ یہ اعلان خوش آئند ہے تاہم حکومت کو اس اعلان کو عملی جامہ پہنانے کی ضرورت ہے تاکہ عوام کو حکومت پر یقین ہوپائے۔

یاد رہے کہ سرینگر ہوائی اڈے سے آج تک کوئی بین الاقوامی خدمات جاری نہیں ہیں، جبکہ انتظامیہ حج کے ایام کے دوران سعودی عرب جدہ ہوائی سروس عارضی طور پر چلاتی ہے۔