'رمضان المبارک میں کورونا سے متعلق رہنما خطوط پر عمل کریں'

مرکزی جامع مسجد گاندربل اور بی ہامہ گاندربل کے امام و خطیب نے لوگوں سے اپیل کی کہ 'کووِڈ - 19 سے محفوظ رہنے کے لیے تمام رہنما خطوط کی پاسداری کریں۔ ضلع گاندربل کی مسجدوں میں نماز تراویح و دیگرنمازوں میں کورونا سے متعلق رہنما خطوط پر مکمل عمل کیا جائے گا۔'

امام و خطیب جامع مسجد گاندربل محمد امین شاہ نے کہا کہ 'اس بابرکت ماہ میں میری یہی دعا ہے کہ الله تعالٰی رمضان المبارک کی برکت و فضیلت سے ملت کے تمام مسائل و مشکلات کو حل فرمائے۔'

انہوں نے مزید کہا کہ 'کووِڈ-19 کے پیش نظر ہمیں کورونا سے متعلق رہنما خطوط پر عمل کرنا ہے، ماسک پہن کر ہی کہیں نکلیں اور سماجی دوری کا خیال رکھتے ہوئے نماز پنجگانہ و تراویح کا اہتمام کریں۔'

وہیں جامع مسجد بی ہامہ گاندربل کے امام و خطیب عابد امین شاہ نے کہا کہ 'ماہ رمضان بابرکت اور رحمت کا مہینہ ہے، اس ماہ میں ہمیں خصوصی طور پر اپنے پڑوسیوں اور ضرورت مندوں کا خیال رکھنا چاہیے، ساتھ ہی اس کورونا وبا کے دوران حکومت کی جانب سے جاری تمام تر رہنما اصول پر سختی سے عمل کرتے ہوئے اس بابرکت ماہ کو گزارنا ہے اور ملک میں پھیلی اس وبا سے نجات کے لیے اللہ پاک سے دعا بھی کرنا ہے۔'