آنے والے پانچ برسوں میں کشمیر میں دس فلمیں بنائوں گا: راہل بھٹ

بالی وڈ فلم اداکار اور پروڈیوسر راہل بھٹ نے اعلان کیا کہ 'وہ اگلے پانچ سال کے دوران اپنی دس فلموں کی شوٹنگ کشمیر میں کریں گے۔'

بالی وڈ فلم اداکار اور پروڈیوسر راہل بھٹ نے کہا کہ وہ اپنی آنے والی فلم 'میڈ ان کشمیر' میں صرف مقامی ٹیلنٹ کو ہی استعمال کریں گے۔ راہل بھٹ نے یہاں نامہ نگاروں کو بتایا کہ 'میں کشمیر میں آنے والے چار پانچ سال میں کم از کم دس فلمیں بنائوں گا۔ میں یہاں کے مقامی ٹیلنٹ کو استعمال کروں گا'۔

راہل بھٹ نے سرینگر میں پریس کانفرنس سے خطاب کرتے ہوئے کہا کہ 'دنیا میں کشمیر کا الگ مقام ہے۔ انہوں نے اپنے خطاب میں کہا کہ 'کشمیر میں آکے مھجے کافی خوشی ہوئی کیونکہ کشمیر اور یہاں کے لوگ بہت خوبصورت اور ملنسار ہے۔ انہوں نے مزید کہا کہ 'یہاں آکر مجھے کوئی ڈر یا گھبراہٹ نہیں ہوئی جیسا خبروں میں دکھایا جاتا ہے۔'

انہوں نے کہا 'میری اگلی فلم کا نام 'میڈ ان کشمیر' ہے۔ اس فلم میں کام کرنے والے سبھی اداکار کشمیری ہوں گے۔ میں ایک بھی اداکار باہر سے نہیں لائوں گا۔ فلم کا ڈائریکٹر کشمیری ہوگا اور پروڈیوسر میں خود کشمیری ہوں'۔

ان کا مزید کہنا تھا کہ 'ہماری کوشش ہوگی کہ فلم کے تکنیکی عملے میں شامل لوگ بھی کشمیری ہوں۔ یہ ایک بین الاقوامی سطح کی فلم ہوگی۔ فلم کی شوٹنگ خزاں یا سرما کے موسم میں شروع کی جائے گی'۔

راہل بھٹ نے کہا کہ 'اس کشمیر نے وہ دن بھی دیکھے ہیں جب بالی وڈ کی ہر دوسری فلم کی شوٹنگ یہاں ہوتی تھی۔ انہوں نے کہا 'اس کی وجہ یہ ہے کہ پوری دنیا میں کشمیری جیسی خوبصورت جگہ اور خوبصورت لوگ کہیں نہیں ہیں۔ لہٰذا اس خوبصورتی کا فائدہ اٹھانے کی ضرورت ہے اور جتنا ممکن ہو سکے مقامی ٹیلنٹ کو استعمال کیا جائے'۔