گاندربل میونسپل کونسل کے ملازمین نے تنخواہ کے مسئلہ پر احتجاج کیا

جموں و کشمیر میں گاندربل میونسپل کونسل کے تقریباً دس ملازمین نے کونسل کے دفتر کے سامنے احتجاج کیا اور افسران پر الزام لگایا ہے کہ انہوں نے ہماری تنخواہیں سنہ 2018 سے روک دی ہیں، جس کی وجہ سے ہم فاقہ کشی کا شکار ہوگئے ہیں۔

گاندربل میونسپل کونسل کے ملازمین کا کہنا ہے کہ ہم آج سے تقریباً بارہ برس قبل بطور ملازم میونسپل کونسل گاندربل میں تعینات کیے گئے تھے اور ہمیں باضابطہ طور پر تنخواہ دی جارہی تھی جب کہ سنہ 2018 سے ہماری تنخواہیں اچانک روک دی گئی ہیں اور جب کہ ہم آج بھی پابندی کے ساتھ اپنی ڈیوٹی انجام دے رہے ہیں اور ہم نے کورونا کے دوران اپنی ڈیوٹی بخوبی انجام دی ہے۔

مظاہرین کا کہنا ہے کہ اس سلسلے میں ہم ہائی کورٹ کے پاس بھی گئے اور ہائی کورٹ نے بھی تنخواہ واگزار کرنے کے احکام صادر کردئے لیکن بدقسمتی سے عدالت کے حکم پر عمل نہیں کیا جارہا ہے اور آج میونسپل کونسل کے آفیسر نے ہم سے کہا ہے کہ آپ لوگ دفتر نہ آیا کریں۔

انہوں نے مزید کہا کہ اگر ہم ملازم نہیں ہیں تو آج تک حکومت ہمیں کس لیے تنخواہ دے رہی تھی اور ہمارے ساتھ جو باقی دیگر ملازمین ہیں انہیں کس بنیاد پر تنخواہ دی جارہی ہے۔ ملازمین کا کہنا ہے کہ وہ ملازمین جو تنخواہ لے رہے ہیں وہ دراصل افسران کے رشتہ دار ہیں۔

وہیں اس سلسلے میں ایگزیکٹیو آفیسر میونسپل کونسل نوید احمد نے کہا ہے کہ عدالت عالیہ کے حکم پر عمل کرنا میرا کام نہیں ہے بلکہ یہ ڈائریکٹریٹ دفتر کا کام ہے، میرا اس معاملہ سے کوئی تعلق نہیں ہے۔