’صوبائی کمشنر نے شاہراہ پابندی سے متعلق جھوٹ بولا‘

کشمیر صوبے کے کمشنر بصیر خان کے شاہراہ پابندی سے متعلق بیان کو جھوٹ قرار دیتے ہوئے نیشنل کانفرنس کے صدر اور سرینگر پارلیمانی حلقے کے رکن فاروق عبداللہ نے کہا کہ ’’صوبائی کمشنر کو لوگوں کے سامنے شاہراہ پر عائد پابندی سے متعلق سچائی بیان کرنی چاہئے۔‘‘

قابل ذکر ہے کہ کشمیر کے صوبائی کمشنر بصیر خان نے بدھ کو سرینگر میں ایک پریس کانفرنس کے دوران کہا تھا کہ ’’جموں-سرینگر شاہراہ پر امرناتھ یاترا کے دوران عام شہریوں کے چلنے پھرنے پر کوئی پابندی عائد نہیں کی گئی ہے۔‘‘

فاروق عبداللہ نے سرینگر میں ایک تقریب کے دوران اس پر اپنا ردعمل ظاہر کرتے ہوئے کہا کہ ’’صوبائی کمشنر کا بیان جھوٹ ہے اور شاہراہ پر عائد پابندی غیر قانونی ہے جس کو فوری طور ہٹایا جانا چاہئے۔‘‘

فاروق کا کہنا تھا کہ انہوں نے از خود شاہراہ پر سفر کے دوران اس کا مشاہدہ کیا ہے کہ ’’عام شہریوں کی گاڑیوں کو فوج اور سیکورٹی اہلکار جگہ جگہ روکتے ہیں۔‘‘

اس حوالے سے فاروق عبداللہ نے شاہراہ پر عائد پابندی کو جلد از جلد ہٹائے جانے کا مطالبہ کیا ہے۔