پاکستان مقبوضہ کشمیر کی دو کمسن لڑکیوں کو گھر بھیجنے کی کوششیں جاری

دفاعی ترجمان کے مطابق لائن آف کنٹرول کے پونچھ سیکٹر میں بھارتی حدود میں داخل ہونے والی پاکستان مقبوضہ کشمیر کی دو کمسن لڑکیوں کی فوری گھر واپس بھیجنے کی کوششیں کی جا رہی ہیں۔

جموں میں تعینات دفاعی ترجمان کا کہنا ہے کہ لائن آف کنٹرول کے پونچھ سیکٹر میں نادانستہ طور پر بھارتی حدود میں داخل ہونے والی پاکستان مقبوضہ کشمیر کی دو کمسن لڑکیوں کو فوری گھر واپس بھیجنے کی کوششیں کی جا رہی ہیں۔

انہوں نے اپنے ایک بیان میں کہا 'پاکستان مقبوضہ کشمیر کی دو لڑکیاں لیبہ زبیر، (عمر 17) اور ثنا زبیر(عمر 13) ساکنان عباس پور تحصیل کہوٹہ اتوار کی صبح نادانستہ طور پر پونچھ سیکٹر کے راستے بھارتی حدود میں داخل ہوگئیں'۔

ان کا مزید کہنا تھا 'ایل او سی پر تعینات ہمارے فوجیوں نے ان لڑکیوں کو سرحد عبور کرتے ہوئے دیکھا اور ان کو کسی بھی نقصان سے بچانے کے لیے حد درجہ احتیاط سے کام لیا، ان لڑکیوں کی فوری گھر واپسی یقینی بنانے کی کوششیں کی جا رہی ہے'۔

ذرائع نے بتایا کہ فوج نے دونوں لڑکیوں کو حراست میں لینے کے بعد پولیس کے سپرد کیا، انہوں نے مزید کہا کہ دونوں کی فوری واپسی یقینی بنانے کی کوششیں جاری ہیں۔

(یو این آئی)