کوروناوائرس: کشمیر میں سخت ترین لاک ڈاؤن جاری

سرینگر، جموں، پلوامہ، شوپیاں، ادھمپور، بانڈی پورہ اور راجوری میں مثبت معاملوں کی رہائش گاہوں کے گردوپیش علاقوں کو بھی سیل کیا گیا ہے۔

جہاں ایک طرف کورونا وائرس سے متاثر افراد کی تعداد میں ہر روز اضافہ ہورہا ہے وہی وادی میں لاک ڈاؤن ہر گزشتہ روز کے ساتھ سخت سے سخت ترین ہوتا جا رہا ہے۔ گزشتہ روز جموں کشمیر میں آٹھ نئے معاملے سامنے آنے سے عوام میں خوف و ہراس بڑھتا جا رہا ہے۔

گزشتہ جمعہ کی طرح آج بھی وادی کے شہر و دیہات میں ہر سو ہو کا عالم دکھائی دے رہا ہے۔ جہاں لاک ڈاؤن کے پیش نظر سڑکوں اور گلی کوچوں میں کرفیو جیسی پابندیاں عائد کی گئی ہیں وہی متعدد علاقے ریڈ زون قرار دے کر سربمہر کر دیے گئے ہیں۔ آج وادی کی کسی بھی مسجد میں جمعہ کی نماز ادا نہیں کی جا سکی۔

سرینگر، جموں، پلوامہ، شوپیاں، ادھمپور، بانڈی پورہ اور راجوری میں مثبت معاملوں کی رہائش گاہوں کے گردوپیش علاقوں کو بھی سیل کیا گیا ہے۔ وہیں دوسری جانب شہر سرینگر کے علاوہ وادی کے دیگر اضلاع میں بھی دفعہ 144 کے تحت سخت ترین پابندیاں عائد کی گئی ہیں۔ لوگوں کو اپنے گھروں میں محدود رہنے کی احتیاتی تدابیر پر عمل کرنے کے لئے سکیورٹی گاڑیوں کے ذریعے اعلانات کیے جارہے ہیں۔ واضح رہے جموں کشمیر میں فی الوقت کورونا وائرس کے 70 معاملے سامنے آئے ہیں جن میں سے دو معمر مریضوں کی موت واقع ہوئی ہے جبکہ تین افراد صحت یاب ہو چکے ہیں۔