آنند شرما نے فاروق عبداللہ اور عمر عبداللہ سے ملاقات کی

کشمیر دورہ پر آنے والی پارلیمانی سٹینڈنگ کمیٹی برائے امور داخلہ کے چیئرمین اور کانگریس کے سینئر لیڈر آنند شرما نے جمعے کو نیشنل کانفرنس صدر ڈاکٹر فاروق عبداللہ اور نائب صدر عمر عبداللہ کے ساتھ اُن کی رہائش گاہ واقع گپکار روڑ پر غیر رسمی ملاقات کی ہے۔

نیشنل کانفرنس ترجمان کے مطابق اس دوران لیڈران نے جموں و کشمیر کی موجودہ صورتحال، سیاسی اتھل پتھل، اقتصادی بدحالی ، معاشی بحران، لوگوں کے درپیش مسائل و مشکلات اور زمینی حالات پر تبادلہ خیالات کیا۔

فاروق عبداللہ نے موصوف سے کہا کہ جموں وکشمیر میں امن و امان و جمہوریت کی بحالی اور عوامی نمائندہ حکومت انتہائی اہمیت کے حامل معاملات ہیں۔

انہوں نے آنند شرما سے کہا کہ ریاست کی نارملسی اور عوام کو راحت پہنچانا ہماری جماعت کی اولین ترجیحات میں شامل ہیں اور ہماری جماعت جموں و کشمیر کے عوام کے حقوق کی بحالی چاہتی ہے۔

دریں اثنا فاروق اور عمر عبداللہ نے اپنی پارٹی کے زونل صدر غلام حسن لون ساکن دیوسر کولگام کی ہلاکت کی شدید الفاظ میں مذمت کی ہے اور ایسے واقعات کو ناقابل قبول قرار دیا ہے۔

انہوں نے مرحوم کے پسماندگان کے ساتھ دلی تعزیت کاا ظہار کرتے ہوئے کہا کہ سیاسی اختلافات کی بنیاد پر کسی کو ابدی نیند سلادینا پوری انسانیت کا قتل ہے۔

لیڈران نے کہا کہ اس واقعہ کی جتنی بھی مذمت کی جائے کم ہے۔ انہوں نے دعا کی کہ اللہ مرحوم کے پسماندگان کو یہ صدمہ عظیم برداشت کرنے کی توفیق عطا فرمائے۔

پارٹی جنرل سکریٹری حاجی علی محمد ساگر، صوبائی صدر ناصر اسلم وانی، ضلع صدر کولگام ایڈوکیٹ عبدالمجید لارمی اور ترجمان عمران نبی ڈار نے بھی واقعہ کی مذمت کی ہے۔

(یو این آئی)