سرینگر: بمنہ میں اربعین حسینی کے موقع پر جلوس عزاء

جموں و کشمیر کے بمنہ میں شہدائے کربلا کا چہلم عقیدت اور احترام کے ساتھ منایا گیا۔ اس دوران جلوس عزاء برآمد ہوئے جس میں عزا داروں نے نوحہ خوانی اور سینہ کوبی کرکے شہدائے کربلا کو خراج عقیدت پیش کیا۔

اسلامی کیلینڈر میں محرم الحرام کی 10 تاریخ کو یزید نے نواسہ رسول حضرت امام حسینؓ اور ان کے ساتھیوں کو میدان کربلا میں شہید کر دیا تھا اسی مناسبت سے ان شہدا کے چہلم کے موقع پر ملک بھر میں مختلف مجالس اور محفلیں منعقد کر کے انہیں خراج عقیدت پیش کیا گیا۔

اربعین کے موقع پر بمنہ سرینگر میں ہزاروں کی تعداد میں عزاداران امام حسینؓ نے جلوس عزاء میں شرکت کی۔

اس موقع پر نوجوانوں نے رضاکارانہ طور پر بلڈ ڈونیشن کیمپ کے علاوہ میڈیکل کیمپ کا بھی انعقاد کیا تھا۔

ان رضاکاروں کا کہنا ہے چونکہ امام حسینؓ کا پیغام ہے کہ انسانیت کو بچانے کے لئے اقدامات کرے تو وہ خون کا عطیہ کرکے یہ فرض نبھا رہے ہیں اور اپنے انداز میں امام حسین کے پیغام اور ان کی تعلیمات پر عمل کر رہے ہیں۔

یہ مجالس اور یہ جلوس عزاء اس بات کی مثال ہے کہ پیغام حسینی آج بھی عام ہے۔