ہماچل پردیش کے ضلع سولن سے کرونا کے 19 نئے معاملے

ریاست ہماچل پردیش میں ایک ڈاکٹر اور دو حاملہ خواتین سمیت کورونا وائرس کے 19نئے مثبت کیسز کی تصدیق ہوئی ہے۔

ہماچل پردیش کے ضلع سولن کے صنعتی علاقے بدی، بروٹ والا اور نالہ گڑھ (بی بی این) میں کورونا مریضوں کی تعداد میں زبردست اضافہ ہوا ہے ایک ڈاکٹر اور دو حاملہ خواتین سمیت 19 افراد میں کورونا کی تشخیص ہوئی ہے۔

ضلع صحت افسر این کے گپتا نے اطلاع دیتے ہوئے بتایا کہ ’’بی بی این میں کچھ لوگ جہاں کورونا متاثرین کے ابتدائی رابطہ میں آئے ہیں تو کچھ رینڈم سیمپلینگ میں مثبت پائے گئے ہیں۔ کورونا متاثرین میں ایک ڈاکٹر بھی شامل ہے۔‘‘

بتایا جا رہا ہے کہ سابق پنچایت پردھان مذکورہ ڈاکٹر کے رابطے میں آئے تھے۔ 19 متاثرین میں پانچ لوگ وہ ہیں جو سابق پردھان کے رابطہ میں آئے ہیں جو مقامی کالونیوں کے رہائشی ہیں۔

ڈاکٹر گپتا کے مطابق اتنی بڑی تعداد میں مثبت معاملے پائے جانے کے بعد ضلع کی محکمہ صحت اور انتظامیہ اب ان کے رابطہ میں آئے لوگوں کی تلاش میں مصروف ہوگئی ہے۔

19نئے معاملات کے ساتھ ہی ضلع میں کورونا متاثرین کی تعداد 59 ہوگئی ہے۔