سہارنپور: مزدوروں کے لیے کھانے کا انتظام

ریاست اتر پردیش کے ضلع سہارنپور میں واقع گاؤں بنّا کھیڑی کے پردھان نے ریاست ہریانہ اور پنجاب سے آنے والے مزدوروں کو ایک اسکول میں ٹھہرایا اور ان کے کھانے کا انتظام کیا۔

پردھان راجیو کمار نے بتایا کہ لاک ڈاؤن کے سبب پڑوسی ریاست سے بھوکے پیاسے آ رہے مزدوروں کو راستے میں پڑنے والے کچھ گاؤں کے باشندوں نے کھانا کھلایا۔

سہارنپور کے گاؤں بنّا کھیڑی کے گاؤں پردھان راجیو کمار کی قیادت میں گاؤں کے باشندوں کی جانب سے رقم جمع کر کے لاک ڈاؤن میں اپنے گھروں کے لئے نکلے پیدل مزدوروں کو ہر روز کھانا کھلایا جا رہا ہے۔ خاص بات یہ ہے کہ مہلک مرض کو دیکھتے ہوئے سوشل ڈسٹینسنگ پر عمل بھی کیا جا رہا ہے۔

راجیو کمار نے بتایا کہ لاک ڈاؤن کی وجہ سے ٹوٹل ڈھابے بند ہونے کے سبب ان مزدوروں کو کھانا نہیں مل پا رہا ہے ایسے میں ہم سب کا فرض بنتا ہے کہ اس موقع پر مزدوروں کی مدد کی جائے۔

خیال رہے کہ کورونا وائرس کے پیش نظر پورے ملک میں لاک ڈاؤن جاری ہے۔ اسی وجہ سے ہریانہ اور پنجاب میں رہ رہے مزدوروں کا کام بند ہو گیا اور انہوں نے گھر آنے کا من بنا لیا ہے۔ بڑی تعداد میں مزدور اپنے گھر لوٹ رہے ہیں۔