ہاتھرس واقعہ کو لے کر والمیکی سماج نے حکومت کے خلاف کیا مظاہرہ

گزشتہ دنوں ہاتھرس میں والمیکی سماج سے تعلق رکھنے والی لڑکی کی اجتماعی عصمت دری کے بعد درندوں نے بے رحمی سے زد و کوب کیا جس کے بعد گزشتہ دو روز قبل علاج کے دوران لڑکی کی موت واقع ہو جانے سے پورے اترپردیش میں ملزمان کے خلاف احتجاجی مظاہرے ہورہے ہیں۔

اسی سلسلہ میں آج ہاتھرس کے اس واقعہ سے مایوس والمیکی سماج کے مرد و خواتین نے سڑکوں پر اتر کر اترپردیش حکومت کے خلاف زبردست نعرے بازی کی۔ دیوبند کے والمیکی سماج کے لوگ ایک جگہ جمع ہوئے اور اپنی ناراضگی کا اظہار کرتے ہوئے ہاتھوں میں تختیاں اور بینر لے کر جی ٹی روڈ پر یوگی اور مودی کے خلاف مردہ باد کے نعرے لگائے۔

انہوں نے کہا کہ اب غنڈہ گردی نہیں چلنے دی جائے گی، اس کے ساتھ ہی انہوں نے یوگی حکومت سے استعفیٰ کا مطالبہ کیا۔ والمیکی سماج کے مظاہرے کو دیکھتے ہوئے پولیس فورس تعینات کی گئی تھی۔