سہارنپور: موبائل دکان سے 37 فونز کی چوری

سہارنپور میں ایک مرتبہ پھر چوروں کا خوف جاری ہے، گزشتہ دیر رات چوروں نے سہارنپور اسٹیشن کے پاس سیمسنگ موبائل کی دکان کو اپنا نشانہ بنایا اور دکان کا شٹر توڑ کر تقریباً 35 موبائل اور 70 ہزار روپے نقد سمیت لیپ ٹاپ لے کر فرار ہوگئے۔

اسی طرح چوروں نے ایک اور واردات تھانہ صدر بازار علاقے میں انجام دی۔ اس سے قبل اسٹیٹ بینک کے اے ٹی ایم کو اکھاڑا تھا اور اس سے لاکھوں روپے اڑالیے تھے۔ ایسا لگ رہا ہے کہ اس وقت چور پولیس کے شکنجے سے بہت دور نظر آرہے ہیں۔

گذشتہ ایک مہینے کے دوران تھانہ صدر علاقے میں یہ دوسری واردات ہے۔ اس سلسلے میں ایس پی سٹی ونت بھٹناگر نے بتایا کہ دیر رات اسٹیشن کے پاس موبائل کی دوکان میں چوری کی واردات سامنے آئی ہے۔ دوکان مالک آج صبح جب دوکان کھولنے کے لیے پہنچا تو اس کی دوکان کا شٹر کھلا ہوا تھا جس کے بعد اس نے پولیس کو اطلاع دی۔ پولیس موقع پر پہنچی اور تفصیلی معلومات حاصل کی۔

انہو ں نے بتایاکہ' دوکان مالک کا کہنا ہے کہ اس کی دوکان سے لاکھوں روپے کا سامان چوری ہوا ہے جس کے تعلق سے تھانہ صدر بازار میں تحریر دے دی گئی ہے اور مقدمہ قائم کرکے کارروائی کی جارہی ہے اور جلد ہی چوروں کو گرفتار کرلیاجائے گا۔'