سہارن پور: پولیس نے ٹرک لوٹ کا پردہ فاش کیا

پولیس نے متاثرہ کی تحریر پر کارروائی کرتے ہوئے آج کرائم برانچ کی ٹیم کے ساتھ جبار کو ٹرک فروختگی کی 80 ہزار روپے کی رقم اور ٹرک کے کچھ پارٹس کے ساتھ گرفتار کر لیا ہے۔

سہارنپور کے تھانہ مرزاپور پولیس اور کرائم برانچ کی ٹیم نے ٹرک چوری کے معاملہ کا پردہ فاش کرتے ہوئے ٹرک ڈرائیور کو ٹرک کے کچھ پارٹس اور اسی ہزار روپے کی نقدی کے ساتھ گرفتار کر کے اسے جیل بھیج دیا۔

موصولہ تفصیلات کے مطابق ضلع شاملی کے تھانہ کاندھلہ کے گاؤں گڑھی دولت کے باشندہ محمد نعمان ولد فرقان نے تھانہ مرزاپور میں تحریر دے کر اپنا ٹرک چلانے کے لئے اپنے دور کے رشتہ دار جبار ولد کامل کو دیا تھا۔ ٹرک کی قسطیں جبار کو ادا کرنی تھی، لیکن جب جبار کو قسط جمع کرنے کو کہتا تو وہ ٹال مٹول کرتا رہا۔ جب جبار کے بھائی کو قسط جمع کرنے کی بات کہی تو اس نے اسے دھمکی دی۔ لیکن اسے گزشتہ روز پتہ چلا کہ جبار نے دو دن پہلے تین دیگر افراد کے ساتھ مل کر اس کے ٹرک کو کباڑی کے یہاں کٹوا دیا اور رٹرک لوٹ کی جھوٹی سازش رچ کر الزام لگایا کہ سینٹرو کار میں سوار بدمعاشوں نے اس کو یرغمال بنا کر ٹرک لوٹ لیا۔

اس سلسلہ میں تھانہ مرزاپور میں تحریر دی گئی ہے۔ متاثرہ فریق نے سہیل کباڑی کے یہاں سے اپنے ٹرک کے باقیات برآمد کر لئے ہیں اور پولیس کو اس سلسلہ میں تحریر دی ہے۔ پولیس نے متاثرہ کی تحریر پر کارروائی کرتے ہوئے آج کرائم برانچ کی ٹیم کے ساتھ جبار کو ٹرک فروختگی کی 80 ہزار روپے کی رقم اور ٹرک کے کچھ پارٹس کے ساتھ گرفتار کر لیا ہے۔ پولیس نے ملزم سے پوچھ گچھ کے بعد اسے جیل بھیج دیا اور اس کے ساتھیوں میں تلاش میں دبش دے رہی ہے۔