سہارنپور: تہواروں کے متعلق رہنما اصول جاری

ضلع انتظامیہ نے تمام پنچایتوں کو احکامات جاری کر دیے ہیں جس کے تحت کووڈ 19 کے اصولوں پر عمل کرنا لازمی ہوگا۔

کووڈ 19 کے باعث تہواروں کے متعلق مرکزی حکومت اور اترپردیش حکومت کی جانب سے جاری کی گئی گائڈ لائن کے بعد سہارنپور ضلع انتظامیہ نے بھی اپنی تیاریاں مکمل کر لی ہیں۔

سہارنپور کے ضلع مجسٹریٹ اکھلیش سنگھ نے آج صحافیوں سے گفتگو کرتے ہوئے بتایا کہ آنے والے تہواروں جیسے درگا پوجا، دسہرہ، دیوالی اور کرسمس پر تہوارو ں کے دوران کووڈ 19 کے تحت نافذ ضابطہ اخلاق پر عمل کرنا لازمی ہوگا۔

انہوں نے کہا کہ اس سلسلے میں ضلع کے سبھی پنچایتوں کو احکامات جاری کر دیے گئے ہیں کہ سبھی کو کووڈ 19 کے اصولوں پر عمل کرنا ہوگا، ساتھ ہی سبھی مقامات پر تھرمل اسکریننگ، سینیٹائزر اور ماسک کا استعمال ضروری ہے۔

انہوں نے کہا کہ سبھی افراد اصولوں پر عمل کرتے ہوئے اپنے اپنے تہواروں کو منائیں کیوں کہ حکومت کی جانب سے گائڈ لائن جاری کردی گئی ہے۔ انہوں نے بتایا کہ کووڈ 19 کی علامت والے شخص کو فوراً قریب کے اسپتال میں داخل کرائیں اور یہ ذمہ داری پروگرام انعقاد کرنے والوں پر ہوگی۔