اس موقع پر جمعیة علماء ہند کے قومی صدر مولانا سید ارشد مدنی نے اپنے خطاب میں کہا کہ 'جمعیة علماء ہند ہمیشہ سے آپسی بھائی چارہ کی بات کرتے ہوئے اپنے مذہبی اقدار پر قائم ہے۔'
انہوں نے کہا کہ 'جمعیة انسانیت کے تعلق سے ہمدردی اور غمگساری کرتی رہتی ہے۔'
مولانا نے کہا کہ 'دیوالی ملن ہندو بھائیوں کا تہوار ہے لیکن جمعیة علماء ہند ہندو بھائیوں کو خوشی میں شریک ہونے کے لئے بلاتی ہے۔'
مولانا مدنی نے کہا کہ 'ہم بڑے پیمانہ پر جہاں تک ہم پہنچ سکتے ہیں امن اور ایکتا کے پیغام کو عام کرتے ہیں اور اسی سلسلہ میں گزشتہ دنوں میری ملاقات آر ایس ایس کے رہنما موہن بھاگوت سے دہلی میں ہوئی اور میں نے ان کے سامنے بھی ملک کے اندر امن وامان قائم رکھنے کی بات کہی'۔
انہوں نے مزید کہا کہ 'موہن بھاگوت نے بھی میری اس امن اور حب الوطنی اور انسانیت کے ساتھ سچی ہمدردی کو بہت سراہا'۔
مولانا نے کہا کہ 'جو لوگ ہندو اور مسلمانوں کے اندر تفریق پیدا کر رہے ہیں وہ اپنا اور ملک کا نقصان کر رہے ہیں، تفریق ایک مرتبہ تقسیم کا سبب بن چکی ہے اگر اس تفریق کو ختم نہیں کیا گیا تو ملک کا بڑا نقصان ہوگا'۔
مولانا نے بابری مسجد کے فیصلہ کے تعلق سے کہا کہ 'ہم پہلے سے ہی کہتے آرہے ہیں کہ عدالت کا جو بھی فیصلہ ہوگا اس کو ہم تسلیم کریں گے، کیونکہ ہمیں مل جل کر اس ملک میں رہنا ہے'۔ انہوں نے کہا کہ 'ہم اپنے ملک کی عدالت عظمیٰ کے فیصلہ پر مکمل یقین رکھتے ہیں'۔
سابق وزیر ہلاش رائے سنگھل نے کہا کہ 'ہمارے شہر دیوبند کے اندر اس طرح کے پیار و محبت کے پیغام سے پورے ملک کو بہت عمدہ سبق ملے گا۔ ونود گپتا نے جمعیة علماء ہند کو مبارک باد دیتے ہوئے کہا کہ جمعیة نے آج اس دیوالی ملن پروگرام سے ہم سب کو پیغام امن و سلامتی دیا ہے اور بھائی چارے کو عام رکھنے کے لیے ایک بہت بہترین کوشش کی'۔
ٹھاکر شیام کمار نے اپنے خطاب میں مولانا سید ارشد مدنی کی ہندو مسلم ایکتا کی بہت ساری کوششوں کو سراہا اور اس بات کا اظہار کیا کہ وہ اپنی پیدائش سے لے کر آج تک اتنا خوبصورت ملک کی محبت سے بھرا ہوا پروگرام کبھی نہیں دیکھا۔
عالمی روحانی تحریک کے سربراہ مولانا حسن الہاشمی نے کہا کہ 'یہ مولانا سید ارشد مدنی نے دیوالی ملن کے پروگرام منعقد کرکے ہندو مسلم ایکتا کی جو بنیاد رکھی ہے ہمیں ان بنیادوں کو قائم و دائم رکھتے ہوئے ہندوستان کے ہر باشندہ سے پیار ومحبت کاسلوک کرنا چاہئے'۔
علازازیں معروف شاعر ڈاکٹر نواز دیوبندی، سہکار بینک کے ضلع چیئرمین چودھری راج پال، ششی والیہ، سردار بالندر سنگھ، ڈاکٹر ڈی کے جین، سٹھ کلدیپ کمار وغیرہ اپنے خطاب آپسی بھائی چارہ کی اہمیت پر زرو دیا۔
