پولیس کا کشتواڑ سے دو عسکریت پسندوں کو گرفتار کرنے کا دعویٰ

سرحدی ضلع کشتواڑ میں پولیس نے دعویٰ کیا ہے کہ اس نے عسکری تنظیم حزب المجاہدین سے وابستہ دو عسکریت پسندوں کو گرفتار کیا ہے۔

جموں و کشمیر کے سرحدی ضلع کشتواڑ میں پولیس نے دو عسکریت پسندوں کو گرفتار کرنے کا دعویٰ کیا ہے۔

پولیس کے مطابق دونوں نوجوان کی شناخت اشفاق قیوم ٹاک ولد عبدالقیوم ٹاک ساکن پاسرکوٹ ٹاک پورا تحصیل چھاترو اور توصیف گیری ولد غلام قادر گیری ساکن پوچھال تحصیل کشتواڑ کے طور پر کی گئی ہے۔

پولیس کے بیان کے مطابق پولیس اسٹیشن چھاترو کو معلوم ہوا ہے کہ لاپتہ نوجوانوں نے عسکری تنظیم حزب المجاہدین میں شمولیت اختیار کرلی تھی۔ اس سلسلے میں پولیس اسٹیشن چھاترو میں 24 اگست کو ایف آئی آر زیر نمبر (FIR No53/2021 U/Sec 13,18-B UAPA) درج بھی کی گئی ہے۔

ایس ایس پی کشتواڑ نے پریس بیان جاری کرتے ہوئے کہا کہ پولیس اور سی آر پی ایف کی 52 بٹالین نے پاسرکوٹ کے جنگلوں سرچ آپریشن چلایا ہے جس میں دونوں نوجوانوں کو گرفتار کیا گیا ہے، پولیس کے مطابق سرچ آپریشن میں عسکریت پسندوں سے گولہ بارود بھی برآمد کیا گیا ہے۔