سرحد پر گولہ باری میں کمسن لڑکی ہلاک، متعدد زخمی

جموں و کشمیر کے ضلع پونچھ میں لائن آف کنٹرول پر آج ہند پاک فوج کے درمیان گولہ باری کے شدید تبادلے میں ایک کمسن لڑکی ہلاک جبکہ پانچ فوجی اور پانچ عام شہری زخمی ہوئے۔

کرشنا گاٹھی اور شاہپور کرنی سیکٹروں میں ہونے والی اس ہلاکت خیز گولہ باری کے نتیجے میں کئی رہائشی مکانات کو بھی نقصان پہنچا ہے۔

دریں اثنا ایل او سی پر فائرنگ کے پیش نظر ضلع پونچھ کے متعدد سرحدی علاقوں میں پیر کے روز تعلیمی ادارے بند رہے۔

سرکاری ذرائع نے بتایا کہ فائرنگ کے پیش نظر ضلع پونچھ کے مختلف سرحدی علاقوں بشمول شاہپور، کرنی، ماندھار اور قصبہ میں ضلع مجسٹریٹ کے احکامات پر تعلیمی ادارے بند رہے۔
اس حوالے سے ضلع مجسٹریٹ پونچھ کی طرف سے جاری حکم نامے میں کہا گہا تھا کہ 'آرپار کی گولہ باری کے پیش نظر شاہپور، ماندھار اور قصبہ کے کچھ حصوں بشمول ہائز سیکنڈری اسلام آباد تعلیمی ادارے پیر کے روز بنا بر احتیاط بند رہیں گے'۔

ایک دفاعی ترجمان نے بتایا کہ پونچھ ضلع میں لائن آف کنٹرول پر شاہپور کرنی اور منکوٹ کرشنا گاٹھی علاقوں میں پیر کی صبح پاکستانی فوج نے چھوٹے اور بھاری ہتھیاروں کا استعمال کرکے گولہ باری اور فائرنگ کی جس کے نتیجے میں ایک کمسن لڑکی ہلاک جبکہ پانچ فوجی اور پانچ شہری زخمی ہوئے۔

سرکاری ذرائع نے بتایا کہ پانچ شہری پونچھ کے شاہپور، کرنی، ماندھار اور باندی دیہات میں زخمی ہوئے ہیں۔

موصولہ اطلاعات کے مطابق طرفین کے مابین گولہ باری کا شدید تبادلہ ہوا۔ پاکستان کی طرف سے بھاری ہتھیاروں کے استعمال کے علاوہ مارٹر گولے داغے گئے ہیں۔