ادھم پور: کریشر سے عوام کو مشکلات

کریشر سے پریشان ہو کر عوام نے بزرگ جوان خواتین اور بچوں سمیت پٹیل کمپنی کی من مرضیوں کے خلاف سخت احتجاج کیا۔

ضلع رامبن کے سنگلدان علاقے میں لگائے گئے کریشر مقامی آبادی کے لئے وبال جان بن چکے ہیں۔ یہ کریشنر ناردن ریلوے کی جانب سے ادھم پور کٹرہ بانہال ریلوے پروجیکٹ کی تکمیل کے لئے مامور پٹیل کمپنی کی جانب سے لگائے گئے ہیں۔

ماحولیات کو بچانے کے لئے وضع کئے گئے قوانین کے برعکس کریشر سے اڑنے والا دھواں اور شور آس پاس کی آبادی کے لئے بدترین مشکلات پیدا کر رہا ہے۔ مقامی آبادی کی جانب سے کئی بار متعلقہ حکام کو شکایات درج کرانے کے باوجود آج تک اس جانب کوئی توجہ نہیں دی گئی۔

عوام نے آخر کار تنگ آکر آج کریشر کا کام بند کرنے کے لیے بزرگ جوان خواتین اور بچوں کے سمیت پٹیل کمپنی کی من مرضیوں کے خلاف سخت احتجاج بھی کیا۔ عوام کی اپیل ہے کہ پروجیکٹ کی تعمیر کے دوران مقامی آبادی کی صحت اور سکون کا بھی خیال رکھا جائے۔ انہوں نے الزام لگایا کہ مقامی انتظامیہ عوام کو یہاں سے ہجرت کرنے پر مجبور بھی کر رہی ہے۔