خطہ چناب میں وکلاء کی ہڑتال دوسرے روز میں داخل

ریاست جموں کشمیر میں خطہ چناب کی سبھی عدالتوں کی طرح ضلع رام بن میں بھی وکلاء اور جوڈیشل ملازمین کی کام چھوڑ ہڑتال منگل کو دوسرے روز میں داخل ہوئی۔

احتجاجی وکلاء کے مطابق چند دن قبل سماجی رابطے کی ویب سائٹوں پر ایک ویڈیو وائر ہوئی تھی جس میں پولیس نے جوڈیشل مجسٹریٹ کے ساتھ رام بن میں مبینہ طور بدتمیزی کی تھی۔

ای ٹی وی بھارت کے ساتھ بار کرتے ہوئے بار ایسو سی ایشن رام بن کے صدر کا کہنا تھا کہ ’’عزت مآب جج صاحب راستے میں سیشن جج کا انتظار کر تھے تھی اور انہوں نے کسی قانوں کی خلاف ورزی نہیں کی، پھر بھی رام بن پولیس نے ان کے ساتھ بد تمیزی کی۔‘‘

انہوں نے اس واقعے پر افسوس کا اظہار کرتے ہوئے کہا کہ ’’اگر جج صاحبان کے ساتھ پولیس کا یہ رویہ ہے تو عوام کے ساتھ انکا سلوک کیسا ہوگا!‘‘

بار ایسو سی ایشن رام بن کے نائب صدر نے ای ٹی وی بھارت کے ساتھ بات کرتے ہوئے کہا کہ ایسے واقعات پہلے بھی رونما ہو چکے ہیں۔ انکے مطابق ’’ریاست جموں و کشمیر ایک ’پولیس اسٹیٹ‘ میں تبدیل ہو رہی ہے۔‘‘

دریں اثناء، دو روز سے جاری اس ہڑتال کے سبب پہاڑی ضلع رام بن کی عوام کو شدید مشکلات کا سامنا کرنا پڑ رہا ہے۔