سڑک کی ادھوری مرمت، پنلہ رام بن میں عوام کا احتجاج

ریاست جموں کشمیر کے پہاڑی ضلع رام بن میں پنلہ علاقے کے لوگوں نے سڑک کی خستہ حالت اور ادھوری مرمت کو لیکر انتظامیہ کے خلاف احتجاج کیا۔

نمائندے کے مطابق ضلع میں پوگل پرستان تحصیل کے علاقہ پنلہ کے لوگوں نے سڑک کی خستہ حالت اور ادھوری مرمت کے خلاف احتجاج کرتے ہوئے مانگ کی کہ سڑک کو گاڑیوں کی آمد و رفت کے قابل بنایا جائے۔

انہوں نے الزام عائد کرتے ہوئے کہا کہ ’’سڑک کی تعمیر کر رہے ٹھیکیدار ناقص مواد کا استعمال کر رہے ہیں، اور جگہ جگہ پتھرروں کو ہٹانے کے بجائے ان پر مٹی دال کر انہیں چھپایا جا رہا ہے۔‘‘

احتجاجی عوام کا کہنا تھا کہ سڑک کی ادھوری مرمت کے بعد ٹھیکہ دار مشینوں کو واپس لے جا رہے ہیں جبکہ سڑک کی مرمت مکمل نہیں ہوئی ہے۔

احتجاجیوں کا کہنا تھا کہ اس سڑک سے مال بردار چھوڑی گاڑیوں کا گزرنا بھی نا ممکن ہے۔

انکا مزید کہنا تھا کہ دہائیوں سے اس سڑک پر مرمت کا کام چل رہا ہے تاہم ابھی تک اس سڑک کو گاڑیوں کی آمد و رفت کے قابل نہیں بنایا گیا۔

انہوں نے انتظامیہ سے اپیل کی کہ سڑک کی مرمت کرکے عوامی مشکلات کا ازالہ کیا جائے۔