کل جماعتی میٹنگ کی تجاویز پر اقدامات اٹھائے جائیں گے: نتیش

وزیر اعلیٰ نے کہا کہ دنیا بھر میں کورونا انفیکشن کے معاملے تیزی سے بڑھ رہے ہیں۔ بہار میں بھی کورونا کے معاملے بڑھ رہے ہیں۔

بہار کے وزیر اعلیٰ نتیش کمار نے آج کہا کہ کورونا بحران پر تبادلہ خیال کے لئے گورنر کی صدارت میں ہونے والی کل جماعتی میٹنگ سے موصول تجاویز کی بنیاد پر قدم اٹھائے جائیں گے۔

کمار نے جمعرات کو یہاں آئی جی آئی ایم ایس میں کورونا کا دوسرا ٹیکہ لینے کے بعد نامہ نگاروں سے بات چیت میں کہا کہ وزیراعظم نے کہا تھا کہ گورنر سطح پر سبھی جماعتوں کی میٹنگ ہونی چاہئے۔ انہوں نے گورنر سے اجلاس کیلئے درخوست کی ہے۔ 17 اپریل کو گورنر کی قیادت میں ہونے والی کل جماعتی میٹنگ میں سبھی لوگوں کی جو تجاویز آئیں گی اس کی بنیاد پر قدم اٹھائے جائیں گے۔

وزیر اعلیٰ نے کہا کہ دنیا بھر میں کورونا انفیکشن کے معاملے تیزی سے بڑھ رہے ہیں۔ بہار میں بھی کورونا کے معاملے بڑھ رہے ہیں۔ اس سے متعلق ایک ایک چیز پر نظر رکھی جارہی ہے۔ زیادہ سے زیادہ کورونا جانچ کرائے جارہے ہیں۔

انہوں نے کہا کہ جتنی زیادہ جانچ ہوگی اتنی ہی متاثرین کی تعداد کا پتہ چل پائے گا جن علاقوں میں انفیکشن کا پتہ چل رہا ہے ان علاقوں پر خاص نظر رکھی جارہی ہے۔

کما رنے کہا کہ آر ٹی پی سی آر جانچ کی تعداد بڑھائی جارہی ہے۔ کورونا جانچ کی تعداد ریاست میں روزانہ ایک لاکھ سے زیادہ کرائی جارہی ہے اسے اور بھی بڑھایا جائے گا۔ ریاست میں زیادہ سے زیادہ لوگوں کی ٹیکہ کاری بھی کرائی جائے گی تاکہ کورونا انفیکشن کا اثر لوگوں پر کم سے کم ہو سکے۔

انہوں نے کہا کہ کورونا ملک کے سبھی ریاستوں میں پھیل رہا ہے۔ ایک جگہ سے دوسری جگہ لوگ آ جا رہے ہیں۔ بہار میں باہر سے آنے والے لوگوں کی بھی جانچ کی جارہی ہے۔

یو این آئی