ہماری تہذیب ہے ہم بڑے بھائی کے خلاف نہیں لڑتے: اسدالدین اویسی

اسدالیدن اویسی نے جوکی ہاٹ کے امیدوار شاہنواز عالم کے بڑے بھائی کو مخاطب کرتے ہوئے کہا کہ 'آپ ابھی اپنے چھوٹے بھائی کی حمایت کریں میں آپ کے لیے پارلیمانی انتخابات میں ووٹ مانگنے آؤں گا'۔

آل انڈیا مجلس اتحاد المسلمین کے قومی صدر بیرسٹر اسدالدین اویسی آج ارریہ کے جوکی ہاٹ اسمبلی حلقہ کے اودا ہاٹ واقع ہائی اسکول گراؤنڈ میں ایک انتخابی اجلاس عام سے خطاب کرنے پہنچے۔ جوکی ہاٹ سے مجلس امیدوار شاہنواز عالم کی حمایت میں پہنچی لوگوں کی بھیڑ دیکھ کچھ وقت تک افراتفری کا ماحول بنا رہا۔ اجلاس کی صدارت جوکی ہاٹ بلاک کے صدر مولانا عبداللہ سالم چترویدی نے کی۔

اجلاس سے خطاب کرتے ہوئے امیدوار و موجودہ رکن اسمبلی شاہنواز عالم نے کہا کہ میں آر جے ڈی کا سچا سپاہی تھا مگر کن حالات میں میرا ٹکٹ کاٹ دیا گیا اس سے آپ بخوبی واقف ہیں۔ ہمارے ساتھ جو زیادتی ہوئی ہے وہ آپ کے نظروں کے سامنے ہے۔ فیصلہ آپ کے ہاتھ میں ہے۔ گزشتہ دو سالوں میں جوکی ہاٹ اسمبلی حلقہ کے لئے مجھ سے جہاں تک ممکن ہوا میں نے ترقیاتی کام کئے۔ عوام کے دکھ سکھ میں دن رات کھڑا رہا۔ چاہے لاک ڈاؤن ہو یا پھر سیلاب، میں نے آپ کی خدمت کی ہے۔ اب میں آپ سے مزدوری چاہتا ہوں۔

مجلس کے قومی صدر بیرسٹر اسدالدین اویسی نے عوامی ازدہام سے خطاب کرتے ہوئے کہا کہ یہ سیمانچل مرحوم تسلیم الدین صاحب کی وجہ سے جانا جاتا ہے۔ ان کے نقش قدم پر چلتے ہوئے شاہنواز عالم نے لوگوں کی حمایت حاصل کی ہے۔ یہاں ان کے خلاف ان کے بڑے بھائی سرفراز عالم میدان میں ہیں۔ میں ان سے درخواست کرنا چاہتا ہوں آپ بڑے ہونے کا فرض نبھائیں۔ بڑوں کی جگہ اونچی جگہ ہے۔ آپ اپنے چھوٹے بھائی کی حمایت کا اعلان کریں۔ رکن پارلیمان میں ہم آپ کے لیے یہاں لوگوں سے ووٹ مانگنے کے لئے آئیں گے۔ آپ کی جگہ پارلیمنٹ میں ہے۔ اسدالدین اویسی نے کہا کہ یہاں ہمارا مقابلہ سیدھے نریندر مودی سے ہے اور کسی سے نہیں۔ آخر میں عوام سے اجازت لے کر اسدالدین اویسی نے شاہنواز عالم کے گلے میں پیشگی جیت کا مالا پہنایا۔