پٹنہ: یو پی ایس سی یعنی یونین پبلک سروس کمیشن نے رزلٹ جاری کیا ہے۔ جس میں بہار کے ایک لعل نے ملک بھر میں علاقے اور گھر والوں کا نام روشن کیا ہے۔ بہار کے نالندہ ضلع کے رہنے والے فیصل رضا (Topper Faisal Raza) نے یو پی ایس سی امتحان 2020 میں کامیاب ہوکر ملک میں نام روشن کیا ہے۔ جمعہ کو جاری نتائج میں فیصل رضا نے 447واں رینک حاصل کیا ہے۔
فیصل رضا راجگیر بلاک حلقہ کے مولاناڈیہہ گاؤں کا رہنے والے ایک کیرانہ دکاندار کا لڑکا ہے۔ رزلٹ آنے کے بعد گھروالوں میں خوشی کا سماں ہے۔ ایک دوسرے کو مٹھائی کھلا کر مبارکباد دے رہے ہیں۔ اس موقع پر فیصل رضا کے بھائی تقی احمد نے بتایا کہ سول سروسز 2020 میں 447واں رینک لاکر پورے کنبہ سمیت بلاک کے لوگوں کا حوصلہ بڑھایا ہے۔
فیصل رضا کے والد محمد مستقیم اور ماں قمرالنساء کافی خوش ہیں۔ والد امیر گنج بازار میں ایک چھوٹا کیرانہ کی دکان چلاتے ہیں۔ انہوں نے بتایا کہ پانچ بھائیوں میں فیصل رضا سب سے چھوٹا ہے۔ وہ پچپن سے ہی پڑھنے لکھنے میں کافی محنتی ہے۔ اس کا خواب تھا کہ وہ یو پی ایس سی میں جائے۔ انہوں نے وہ خواب پورا کر لیا ہے جسے برسوں سے تراشا تھا۔