پریان فاونڈیشن کا قابل ستائش اقدام

ریاست بہار کے ضلع کشن گنج میں تعلیمی پسماندگی کو دور کرنے کے لیے پریان فاونڈیشن کی جانب سے 60 مستحق مسلم طلبہ کو مفت دینی و عصری تعلیم دی جارہی ہے۔

ریاست بہار کے ضلع کشن گنج میں تعلیمی پسماندگی کو دور کرنے اور نو نہالوں کو روزگار سے جوڑنے کے لیے پریان فاونڈیشن(کیرالہ) کی کوشش مسلسل جاری ہے۔

فاونڈیشن کے ذریعہ ضلع کے بھریاڈانگی علاقہ میں واقع انسٹیٹیوٹ آف اکیڈمک ایکسیلنس میں فی الوقت 60 بچوں کو دینی اور عصری تعلیم دی جارہی ہے، ان میں سے زیادہ تر بچے غریب ہیں جو کشن گنج کے گاؤں و دیہات سے تعلق رکھتے ہیں۔

پریان فاونڈیشن کے صدر زبیر ہدیوی کہتے ہیں کہ کشن گنج میں اسی سال کوردوا انسٹی ٹیوٹ آف اکیڈمک ایکسیلنس کا افتتاح کیا گیا اورداخلہ کے لیے تقریبا 250 بچے انٹرنس امتحان میں شریک ہوئے جن میں سے 60 بچوں کو ہم نے سلیکٹ کیا ہے۔

انہوں نے مزید کہا کہ طلباء کو دینی ماحول میں دینی تعلیم کے ساتھ ساتھ انگریزی، سائنس، ہندی، اردو اور عربی کی تعلیم دی جارہی ہے۔

ہم ان بچوں کو اعلی تعلیم دیکر ان کا مستقبل سنوارنا چاہتے ہیں تاکہ کشن گنج ضلع کا شمار بھی ترقی یافتہ ضلعوں میں ہو۔ ساتھ ہی ہم یہ بھی چاہتے ہیں کہ ہمارے ذریعہ سینچا گیا ہر بچہ سماج کے دوسرے لوگوں کے لیے مشعل راہ ہوں اور وہ ڈاکٹر، ایڈوکیٹ، سوشل ورکراور انجینئر وغیرہ بن کر قوم و ملت کی خدمت میں اہم کردار ادا کرسکیں۔

ہدیوی نے مزید کہا کہ ہم ایک ایسے ہندوستان کا تصور کرتے ہیں جہاں امن و امان کے ساتھ تمام لوگ ترقی کریں اور ہمارا ملک ہمیشہ آگے بڑھتا رہے۔