پارٹی کے قومی صدر انیل کمار نے نامہ نگاروں سے بات چیت میں کہاکہ ریاست میں بے روزگاری، بدعنوانی اور تعلیم کی بد حالی سے لوگ کراہ رہے ہیں۔ وزیراعلیٰ نتیش کمار کے 15 سالوں کی مدت کار میں بدعنوانی کا بول بالا ہورہاہے۔
انہوں نے کہا کہ بہار کے نوجوانوں کو اچھی تعلیم نہیں مل پارہی ہے۔ اچھی تعلیم کے لیے نوجوانوں کو دیگر ریاستوں میں جانا پڑ رہا ہے۔
انیل کمار نے کہا کہ حکومت روز گار کی تخلیق کا ڈھنڈورہ پیٹ رہی ہے جبکہ سچائی یہ ہے کہ نوجوان روزگار کی تلاش میں دیگر ریاستوں میں نقل مکانی کرنے پر مجبور ہیں۔ گذشتہ پندرہ سالوں میں ریاست سے نقل مکانی کرنے والوں کی تعداد میں اضافہ ہوا ہے۔ انہوں نے الزام عائد کیا کہ حکومتی دفاتر میں بدعنوانی کا یہ عالم ہے کہ بغیر رشوت دیے لوگوں کا کوئی بھی کام نہیں ہو پارہا ہے، لوگوں کو بدعنوانی سے بھی نجات چاہیے۔
انہوں نے کہا کہ کیرل اور مغربی بنگال کی طرز پر بہار اسمبلی سے بھی سی اے اے اور این پی آر کے خلاف تجویز پاس کرنا چاہیے۔ ان سب مطالبات کو لےکر اٹھارہ فروری کو پٹنہ میں دس کیلومیٹر سے زائد طویل انسانی زنجیر بنائی جائے گی۔ جس میں سماج کے سبھی طبقات کے لوگ بڑی تعداد میں حصہ لیں گے۔