ایڈیشنل چیف الیکشن افسر سنجے کمار سنگھ نے جمعرات کو یہاں بتایاکہ کمیشن نے مونگیر کے حالات کو مد نظر رکھتے ہوئے ضلع مجسٹریٹ اور پولیس سپرنٹنڈنٹ کو فوری اثر سے ہٹانے کا حکم دیا ہے ۔ انہوںنے بتایاکہ کمیشن نے مگدھ کے ڈویژنل کمشنر اسنگا چوبا آﺅ کو پورے معاملے کی جانچ کر کے ایک ہفتہ کے اندر رپورٹ پیش کرنے کی ہدایت دی ہے ۔
مسٹر سنگھ نے بتایاکہ کمیشن نے مونگیر میں نئے ضلع مجسٹریٹ اور پولیس سپرنٹنڈنٹ کو آج ہی بحال کرنے کی ہدایت دی ہے ۔
غورطلب ہے کہ مونگیر ضلع کے کوتوالی تھانہ علاقہ میں 26 اکتوبر کو مورتی ویسرجن کے دوران ہوئی فائرنگ میں ایک نوجوان کی موت ہوگئی اور چھ دیگر زخمی ہوگئے ۔ ضلع مجسٹریٹ راجیش مینا اور پولیس سپرنٹنڈنٹ لیپی سنگھ نے منگل کو بتایا تھاکہ دین دیال اپادھیائے چوک پر سموار کی رات مورتی ویسرجن کے دوران غیر سماجی عناصر کی جانب سے پولیس اور بھیڑ پر ہوئی فائرنگ میں ایک نوجوان کی موت ہوگئی اور چھ دیگر زخمی ہوگئے ۔
دونوں افسران نے بتایا تھاکہ غیر سماجی عناصر کی جانب سے کئے گئے پتھراﺅ میں سنگرام پور تھانہ صدر سروجیت کمار ، کوتوالی تھانہ صدر سنتوش کمار سنگھ ، قاسم بازار تھانہ صدر سلیش کمار اور واسودیو پور پولیس آﺅٹ پوسٹ کے صدر سشیل کمار سمیت 20 پولیس اہلکار بھی زخمی ہوگئے ۔
