لالو کی پارٹی میں بغاوت کے آثار

بھارتی ریاست بہار کے ضلع مظفرپور سے راشٹریہ جنتا دل کے واحد رکن اسمبلی نے سابق نائب وزیر اعلی تیجسوی یادو سے بہار اسمبلی کے حزب اختلاف کے عہدے سے استعفی دینے کا مطالبہ کیا ہے۔

لوک سبھا انتخابات میں شکست کے بعد راشٹریہ جنتا دل میں بغاوت کی آواز بلند ہونے لگی ہے۔ ضلع مظفرپور کے گائے گھاٹ سے رکن اسمبلی مہیشور پرساد یادو نے تیجسوی یادو سے حزب اختلاف کے عہدے سے استعفیٰ دینے کو کہا ہے۔

مہیشور نے صحافیوں سے کہا کہ کنبہ پروری کی وجہ سے آر جے ڈی کی حالت خراب ہوئی ہے۔ انہوں نے کہا 'آر جے ڈی کنبہ پروری میں الجھی ہوئی ہے، اور اسی وجہ سے پارٹی کی بری حالت ہوئی ہے۔

انہوں نے کہا کہ پارٹی میں کئی سینیئر رہنما ہیں جنہیں یہ ذمہ داری دی جا سکتی تھی، لیکن کنبہ کی وجہ سے خاندان کے لوگوں کو ہی یہ ذمہ داری دی گئی۔

مہیشور نے کہا کہ اگر تیجسوی یادو استعفی نہیں دیتے ہیں تو آئندہ انتخابات میں پارٹی کی حالت اور خراب ہو جائے گی۔