ہائی کورٹ کے جسٹس چکر دھاری شرن سنگھ کی بینچ نے کورونا وبا سے متعلق دائر مفاد عامہ کی عرضیوں پر سماعت کر کے ریاستی حکومت کو کل تک لاک ڈاﺅن پر غور کر کے جواب دینے کی ہدایت دی ہے ۔
عدالت نے ریاست میں کورونا وباکی بگڑتی صورتحال پر سخت ناراضگی ظاہر کرتے ہوئے کورونا سے نمٹنے کیلئے ریاستی حکومت کی کوششوں کو ناکام بتایا ۔ جج نے کہاکہ مرکزی صحت ٹیم اور ریاستی حکومت کی رپورٹ میں تضاد ہے ۔
عرضی گذاروں کی جانب سے عدالت کو بتایا گیا کہ پٹنہ میڈیکل کالج اسپتال ( پی ایم سی ایچ ) میں کورونا مریض کی تعداد کم ہونے کے بعد بھی آکسیجن کی کھپت زیادہ ہے ، جبکہ نالندہ میڈیکل کالج اسپتال ( این ایم سی ایچ ) میں کووڈ مریضوں کی تعداد زیادہ ہونے کے باوجود آکسیجن کی مقدار کم ہے ۔اس میں کالا بازاری کا اندیشہ ظاہر کیا گیاہے ۔
عدالت کو یہ بھی بتایا گیا کہ پٹنہ کے آئی جی آئی ایم ایس کو کووڈ اسپتال بنانے کی رفتار بھی دھیمی ہے بہٹا کے ای ایس آئی سی اسپتال میں بھی سہولیات کا فقدان ہے جس کی وجہ سے کووڈ مریضوں کا علاج نہیں ہوپارہاہے جبکہ ڈاکٹروں وہاں موجود ہیں۔ اس معاملے پر بھی کل سماعت جاری رہے گی ۔
یواین آئی۔۔ قمر
